Kalaallinik kajumittunik suleqatissarsiulerput
Kajumissutsiminnik ukioq ataaseq suliffigisinnaavaatit angerlarsimaffeqanngitsut ornittagaat, utoqqaat illui imaluunniit meeqqeriviit, taava inissannik kaasarfimmiussannillu akilissavatsigit. Kristumiut suliniaqatigiiffiata Diakonissestiftelsenip inuusuttunut 18-it 30-llu akornanni ukiulinnut taama kajumissaaripput.
Suliniut Diakoniåret - Danmarkimi inunnik isumaginninnermik ilagiinnilu suliniaqatigiiffiit 21-it peqataaffigisaraat, inuusuttunik kajumissutsiminnik sulerusuttunik Danmarkimut, Europamut imaluunniit USA-mut ikiuiartortitsisartoq.
Suliniutinut inuusuttut ukiumut 25-t 35-illu akornanniittut peqataasarput. Siornatigut sulisussarsiornerit inuusuttunut Danmarkimiittunut Europamiittunullu neqeroorutaasarsimavoq, maannali kalaallinik, Danmarkimi Kalaallit Nunaannilu najugalinnik ilassarsiulerput.
- Uaguttaaq kalaallit kulturiannik ilikkagaqarusuppugut, kulturi saqqumilaarnerusariaqarpoq kalaaliunerlu paasisaqarfiginerusariaqarparput. Kirstine Rønnov Due, suliniummi aqutsisoq oqarpoq.
Qalunaat kalaallinit ilikkagaqarsinnaanerarpai.
Suliniaqatigiiffiit aningaasanik kajumissutsiminnik suleqataasut angalanerannut, nerisaqarnerannut, ineqarnerannut kaasarfimmiussaannullu EU-mut qinnuteqartarput. Meeqqat inuusuttullu, utoqqaat, angerlarsimaffeqanngitsut atornerluisullu sullinneqarnerupput.
- Suliniut ilageeqarnermik aallaaveqarneruvoq, kisianni kristumiuunngitsunik, soorlu musliminik aamma suleqateqarpugut. Tamanut ammavoq, erseqqissaavoq.
Kalaallinik suleqatissarsiorneq isuma nutaajuvoq. Diakonissestiftelsen-ip naatsorsuutigaa kalaallit Danmarkimi suleqatigiiffii aamma Kalaallit Nunaanni oqaluffeqarfiit suleqatigissallugit.