Kalaallinik Danmarkimi atugarliortunik ikiuerusupput
Ulloqeqqanut radioaviisimi folketingimut ilaasortap Lars-Emil Johansenip Danmarkimi suliniutit kalaallinut atugarliortunut tunngatinneqartut taamaatinneqarnissaat ernumanartoqartillugu oqaaseqarpoq. Tamatumunnga atatillugu ileqqaarniutissat nalunaarutigineqareersut matumani pineqarput. Maannali Danmarkimi naalakkersuisut parti tapersersortigisaat Dansk Folkeparti ileqqaarniuteqarnermut iliuuseqarusulerpoq.
- Suliniutinut aningaasaliissutissat isumaqatigiinniutigineqalerpata ilaatigut taama piumasaqarniarpugut. Naalagaaffeqatigiinni innuttaasut ilaasa, kalaallit atugarliortut, sipaarniuteqarnikkut eqqorneqarnissaat pissusissamisuunngilaq, partip Nunatsinnut tunngasunik oqaaseqartartua Henrik Brodersen, Sermitsiaq.ag-mut oqarpoq.
Suliniutinut aningaasaliissutit atorunnaarsinneqassappata, suliniutit tapiiffigineqartaraluartut soorlu Kofoeds Skole aamma kalaallit illui eqqugaasussaapput.