Kalaalit ornittagaat matuneqassanersut Sofia Rossenip paaserusuppaa

Inuit Ataqatigiinneersup Sofia Rossenip Danmarkimi isumaginninnermut ministeri Benedikte Kjær isumasioqatiginiarlugu ullumi aggersarpaa. Kalaallinut Danmarkimi atugarliortunut sammisassaqartitsiniarnerit qanoq pineqassanersut isumaginninnermut ministerip akissuteqarfigisussaavai.
Allattoq Elisa Isaksen
juunip 02-at 2010 04:45

Danmarkimi naalakkersuisut kalaallinut atugarliortunut suliniuteqarnermi atorneqartaraluartunik aappaagu piiaaniarnerat, kalaallinut Danmarkimiittunut eqqueriaannaavoq.

- Kalaallinut Danmarkimiittunut atugarliortunut neqeroorutit maanna atuuttut pineqarput, matumani ilaatigut angerlarsimaffeqanngitsorpassuit eqqugaariaannaallutik, Folketingimut paarlattaalluni ilaasortaagallartoq Sofia Rossen nassuiaavoq.

- Danmarkimi naalakkersuisut ileqqaarniutitik aalajangiusimaannassappatigik, kalaallit ornittagaat Københavnimiittoq, Aalborgimiittoq, Aarhusimiittoq Esbjergimiittorlu matuneqariaannaapput. Neqeroorutit kalaalerpassuarnut Danmarkimiittunut pingaaruteqartut piuinnarnissaannut isumagininnermut ministeri naalagaaffik sinnerlugu akisussaaqataarusunnersoq paaserusukkakku, Sofia Rossen oqarpoq.

Sofia Rossenip isumaginninnermut ministerimut apeqqutaa ima nipeqarpoq:

- Suliniutit 2010-p kingornagut ingerlateqqinneqarnissaat ministerip qulakkeersinnaavaa, tamannalu pissappat qanoq ingerlateqqinneqassappat?

Folketingi ukiaru katersuuteqqilerpat Juliane Henningsen ernininerminut atatillugu sulinngiffeqareerluni Folketingimi ilaasortatut utissaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq