Kalaaliminernik igaatortarneq unippoq
Københavnimi Kalaallit Illuutaanni kalaaliminernik kissartunik sassaallertoqassaarpoq.
Allattoq Martine Lind Krebs
oktobarip 20-at 2011 09:01
Steffen Jensen, cafeemik ingerlatsisoq, ulluinnaat tamaasa sassaallertalersimagaluarpoq, maannali suleqatiginninnini unitsippaa.
Steffen Jensenip oqarnera naapertorlugu sassaalliisarnerup unitsinneqarnera amerlasuunit ajuusaarutigineqarpoq. Sassaalliisarnerli imminut akilersinnaasimanngitsoq, Steffen Jensen oqarpoq.
Kalaallit Illuutaanni aqutsisut allatut iliorlutik kissartunik sassaallertalernissamut iliuusissarsiorput. Siusinnerpaamilli ukiumi nutaami aatsaat kissartunik nerisassaqaqqilissaaq, taassumalu tungaanut pulaartut kaffi naammagiinnartariaqassavaat.
Steffen Jensen Kalaallit Illuutaata ilaani suli pisiniarfiuteqarpoq, taannali januaarimi matussaaq, pisiniarfimmik anginermik ammaaniarami.
