Kalaalimineerniarfik kajungernartoq

Nunatsinni piniartut ikiliartuinnaraluartut, Maniitsup kommuneani nutaaliortoqarnerata kingorna, kalaalimineerniarfinni neqinik allanillu tunisassiorneq annertusiartorpoq.

Maniitsumi kalaalimineerniarfiup nutarterneqarnissaanut atatillugu ukioq kingulleq ataatsimiisitaliaq aallartinneqarpoq. Qaammat kingulleq Maniitsumi kalaalimineerniarfimmik nutarterineq naammassineqarpoq, nutarterinerlu 150.000.kr.-nit missaanni akeqartoq pisisartunik nutaanik takkussuutsitsilereersimasoq, umiatsiaararsortut peqatigiiffianni siuliuttaasoq Karl Lyberth oqarpoq.

- Maannakkut malugisinnaalereerparput kalaalimineerniarfiliarsimanngisaannartut takkuttalersut, tamannalu uagutsinnut assut malunnarpoq. Aamma pisisartut kalaalimineerniarfimmut iseraangamik tunisassat tukujuminarninngoramik nillataatsitsivimmiittarlutillu, Maniitsumi umiatsiaararsortut peqatigiiffianni siuliuttaasoq Karl Lyberth oqarpoq. .

Piniartut aalisartullu Maniitsumi kalaalimineerniarfimmik atuisuusut 36-iupput. Kalaalimineerniarfiup sulisoqarneranik akileeqataasarnerup saniatigut tunisat nalingata 10 procentia aalisartut piniartullu ingerlaannaq aamma akileraarutigisalerpaat.

- tunisatta 10 procentia kalaalimineerniarfiup ingerlanneqarneranut akiliutigisarparput, taassumalu saniatigut aamma 10 procenti akileeraarutigigallartarlutigu. Tunisagut tamarmik kalaalimineerniarfimmi karsi aqqusaaqqaartarpaa, taamaasillunilu aappaagu akileraarutit pillugit immersuilerutta ajornannginnerusumik takusinnaalissavarput qanoq isertitaqarsimanerluta, Karl Lyberth naggasiivoq.