Kalaalimineerniarfiit piumasaqarfiginerullugit

Inatsisartuni ilaasortat nalunaaqutaq ataatsimut ataatsimiilerpata partiinit inatsisartunilu ilaasortanit ataasiakkaanit siunnersuutit arlaqanngitsut eqqartorneqassapput.

Soorlu ilaatigut Inuit Ataqatigiinni ilaasortap Ane Hansenip nunatsinni kalaalimineerniarfinni inuussutissalerinikkut piumasaqaatit sakkortusineqarnissaannik siunnersuutaa eqqartorneqassaaq.

Angalanerni sillimanissamut atortunik nassataqarnissamik piumasaqaateqartoqalernissaa anguniarlugu, Demokraatini ilaasortap Jens B. Frederiksenip siunnersuutaa eqqartorneqassaaq. Raatiuaqqat - VHF radiot, sumiissusersiutit - GPS-t, ajutuulernermi kalerrisaarutit, attaallaat puttasartut kiisalu meeqqat puttaqutaat aaqanngitsut aallarnerni nassarneqartarnissaat siunnersuummi ilaapput.

Inuussutissarsitigalugu sunngiffimminilu angalasartut assigiimmik siunnersuumi malittarisassiuunneqarnissaat siunnersuutigineqarpoq.

Naalakkersuinermik suliaqartut isumannaallisaanermi allami malittarisassat aamma eqqartuiffigissavaat, tassalu; aqqusinikkut angalannermi malittarisassat nutaat. Biilinut ilaatilluta siunissami qitequteqartalernissatsinnik siunnersuut kingusinnerusukkut eqqartorneqassaaq.

Inatsisartut ukiaq manna ataatsimiinneranni taanna eqqartorneqanngitsuussappat malittarisassat nutaat atuutilersinneqarsinnaanngillat.