Kalaalimerngit qerisut kalaaliminineerniarfinni tuniniarneqarsinnaalernissaat misissuiffigineqarpoq

Kalaalimerngit qerisut kalaalimeerniarfinni tuniniarneqarsinnaannginnerat pillugu inatsisartuni ilaasortap Hans Enoksenip paragraf 36 atorlugu apeqquteqaateqarnerani Inussutissarsiornermut Naalakkersuisuisup Ove Karl Berthelsenip akissuteqarnerani tamanna erserpoq.

Over Karl Berthelsen akissuteqarnermini erseqqissaateqarpoq kalaalimerngit kalaalimineerniarfinni tuniniarneqartartut nerisassanik nakkutilliinermi piumasaqaataasunut ilaatinneqanngimmata, taamaattumik kalaalimerngit qeritillugit tuniniarneqarsinnaanngillat.

Kalaalimerngit nutaajutillugit kalaalimineerniarfinni tuniniarneqarsinnaasutut pineqartut tassaapput, erisakkat, salinneqarsimasut aamma uullineqarsimasut.

- Kalaalimerngit kalaalimineerniarfinni tuniniarneqarsinnaanngitsut tassaapput, tuniniarneqartut aggoqqissaarneqarsimappata, qeritinneqarsimappata, panertinneqarsimappata, tarajorterneqarsimappata pujoorneqarsimappatalu, Inuussutissarsiornermut naalakkersuisoq Ove Karl Berthelsen akissuteqarnermini ilaatigut taamatut oqarpoq.

Kalaalimerngit kalaalimineerniarfinni tuniniarneqarsinnaannginnerannut nassuiaateqarnermini erseqqissaavoq, neqip mingutsinneqarsinnaanera aarlerinarnerulersarmat tamatumalu malitsigisaanik atuisut inuussutissanik toqunartulinnik nerinissaat aarlerinarnerulersarmat.

Taamaattorlu uumasoq pisarineqariiginnarluni qerisimappat, silaannaap nillissusia qerisinnaalerfimmmiit nillernerunera pissutigalugu taava qerititsineq taama ittoq akuerineqarsinnaasoq, Inussutissarsiornermut naalakkersuisoq Ove Karl Berthelsen allappoq.

Hans Enoksenip apeqquteqaataanut akissuteqarnermini Ove Karl Berthelsen oqarpoq inuussutissat pillugit nalunaarut maanna atuuttoq naalakkersuisoqarfimmi suliarineqarmat, tamannalu attumaassuteqartunut tusarniaassutigineqarumaartoq.