Kalaalimerngit pisiariumaneqarluarput
Tassami peqqutaasoq tassaavoq kalaalimernit ilaat nerisassatut EU-mit akuerisaaanngimmata, taamaattumik pisiniarfimmut ilaasortanngoqqaarluni aatsaat pisiarineqarsinnaallutik.
- Nioqqutissaatitta ilaat EU-miit akuerisaanngillat, assersuutigalugu puisip neqaa, taamaattumik pisiassat tamakku immikkut ineqarput immikkullu qerititsiveqarlutik, ilaasortanillu taamaallaat pisiarineqarsinnaallutik, Alberth Jacobsen ulluinnarni aqutsisoq nassuiaavoq.
Qallunaat kalaaliminersiniartartut aammattaaq amerliartortuinnartut
Alberth Jacobsenip maluginiarpaa.
- Qallunaarpassuit Nunatsinnut ukiorpassuarni atassuteqarsimasut amerliartuinnartut tamaanga pisiniartarput, sualummik ilaquttaminnik qaaqqusinialeraangamikkit kalaaliminernik sassaallerusuttaramik, Alberth Jacobsen oqarpoq.
Kalaalimernit Danmarkimut nassiunnerat akisummat pisiniarfimmi pisiassat akii aamma qaffanneqartarput.
- Soorunami assartornerat akisuvoq, aamma Danmarkimut tikisinneqarnerminni misissuataarneqartarput, tamannalu akisoorujussuulluni. Taasuma saniatigut momsi aamma ilannguttussaavarput, Alberth Jacobsen nassuiaavoq.
