Kalaalimerngit D-vitamineqarluarput

Kalaalimerngit D-vitamiineqarluarneri, nakorsaanerup misissuiffigereerlugu ersersippaa. Misissuinerit Nuummi, Tasiilami, Tasiilallu nunaqarfiini sisamaasuni ingerlanneqarpoq.

- Misissuinitsinni peqataasut eqimattakkaarlugit misissuiffigaagut. Eqimattat ilaat kalaaliminertunngiivipput, ilaallu kalaaliminertorluartarlutik. Kalaaliminertunngitsut, D-vitamiinanik annertuumik amigaateqalerput, taamaammat kalaaliminertortarnissaq pingaaruteqarpoq, taama Dronning Ingridip Napparsimavissuani nakorsaaneq Stig Andersen oqarpoq.

Kalaaliminertortarnissaq, aammattaaq qallunaanut Kalaallit Nunaani najugalinnut pingaaruteqarpoq.

Nakorsaanerup Stig Andersennilli erseqqissaatigaa, kalaaliminertorujussuartarnissaq pisariaqanngitsoq . Nerisartakkatta katissagaani kalaalimerngit tyve procentii sinneqartut kalaalimiuniuppata, taava timerput naammattunik D-vitamiineqalersartut, misissuinerit takutippaat.

Saanitta D-vitamiinit assut pisariaqartippai, D-vitamiinimmi saanitsinnik illersuilersarput taamaalillutik napiajunnaartarlutik. Saaniinaanngitsut, nukiilli aamma D-vitamiinit pisariaqartippaat.

- Misissuinitta takutippaat kalaaliminertortanngikkaani, iisartakkanik D-vitamiinitalinik iisisarnissaq pisariaqalersartoq, taamaaliortannikkaanni napparsimalernissaq qaninnerulissammat.

Stig Andersen misissuinermini allanittaaq paasisaqarpoq.

- Kalaallit inuiannit allanit allaanerussuteqarput, taamaammat misissueqqilerpugut paasiniarlugu kalaallit D-vitamiinalu qanoq imminut attaqatigiinnersut, nakorsaaneq oqarpoq.

Inuit D-vitamiinanik amigaatillit amerliartunnginnissaat misissuinerup siunertaraa. Ilanngullugu aamma oqaatigineqarpoq, palersartittarfinni solariummini D-vitamiinik naammattunik pisoqarsinnaanngitsoq.