Kalaaliaratoqqami misissuiffik: Nuummi nammineq kajumissutsiminnik suliaqartut coronamut misissuissasut

Nakorsaaneqarfik Kommuneqarfik Sermersoorlu ataatsimoorlutik coronamik misissuiffimmik Brugsenip saniani pilersitsiniarput. Misissuiffik covid-19-imik ersiuteqanngitsunik misissuiviussaaq.

Nuummi Kalaaliaqqami saarullinnik tuttunik pisarineqaqqammersunik tuniniaaviusimasumi coronamik misissortissinnaanngungajalerputit.

Misissuivimmimmi illoqarfiup qeqqani pilersitsisoqassasoq, nakorsaaneq KNR-imut paasissutissiivoq.

Misissuivik assersuutigalugu angalareersimallutik angerlarsimaannarsimasunut Danmarkimiillu imaluunniit Islandimiit tikinnerminnit ullut tallimat qaangiunneranni misissorteqqittussanut misissuiviussaaq. Imaluunniit covid-19-imik ersiuteqanngitsunut kisiannili misissortittussanut atorneqassalluni, nakorsaaneq, Henrik L. Hansen nassuiaavoq.

Angerlarsimaannarneq misissorteqqinnerlu

Misissuivik nutaaq Kommuneqarfik Sermersuup Nakorsaaneqarfiullu suleqatigiinneraat.

Misissuivik coronamik ersiuteqanngitsunut kisianni nunatsinnut tikinnerminnit ulluni tallimani angerlarsimaannartussaasunut misissuiviussaaq.


Naalakkersuisummi nunatsinnut tikittut tikinnerminnit ullut tallimat qaangiunneranni misissorteqqittarnissaannut malittarisassat atuutilerseqqinnikuuaat. 

Angerlarsimaannarninni pisuttuarsinnaavutit aamma najugaqatigisannut qanillisinnaavutit. 

Niuerniarsinnaavutit.

Allanut pulaassanngilatit, pulaartoqassanngilatit, bussissanngilatit, taxassanngilatit suliartussanallu.

Nunatsinnut tikinnermi ullut tallimat qaangiunneranni misissorteqqissaatit. Misissortinnerup tunillatsissimannginneq uppernarsarpagu suliartoqqissinnaavutit nalinginnaasumillu inuunerit ingerlateqqissinnaallugu.

Misissorteqqinnianngikkuit ulluni 14-ini angerlarsimaannassaatit aatsaallu ersiuteqanngikkuit suliartoqqillutit.

Taassumalu Kalaaliarakoq Kommuneqarfik Sermersuumit pigineqartoq misissuivissatut naleqqussoraa. Aamma naak taanna illoqarfiup qeqqani inuit ulluinnarni niuerniarfigisartagaata, Brugsenip eqqannguaniikkaluartoq.

- Inuit ersiuteqanngitsut eqqartorpagut, ilumoorporlu taakku tunillatsissimannginnissaat qulakkiivissinnaanngilarput. Kisianni ilimanassusaa annertunngilaq. Taamaammat inuit taakku allanut tamanut akuliutinnginnissaat pillugu malittarisassanik pisariaqartunik aamma suliaqartoqassaaq, nakorsaaneq oqarpoq.

- Taamaammat aamma piffissamik inniminniisarfeqassaaq, taamaalilluni inuit ataatsimoortut amerlavallaartinneqassanatik.

Ersiuteqaraanni illoqarfiup eqqani ulapaarfiusumukarluni misissortikkiartortoqassanngilaq. Ersiuteqartut Dronning Ingriup Napparsimmavissuanut sianerlutik piffissamik inniminniissapput.

Kommunimit nammineq kajumissutsiminnik suliaqartut vatpindinik takisuunik atortoqassasut

Misissuinissamulli assaat amigaataapput, taamaammat Kommuneqarfik Sermersooq sulisuminit suliaqarsinnaasunik ujaasisussanngortinneqarpoq.

Dronning Ingriup Napparsimmavissuani inissaqartitsineq naammanngilaq.

Ilinniartitsisut kommunimi sulianik isumaginnittut assersuutigalugu sulisinnaapput. Aamma utoqqarnik kiffartuussisuusinnaapput.

- Misissuivimmi taamaattumi assigiinngitsut ajunngitsumik ingerlasussaapput. Assersuutigalugu piffissamik inniminniisarfimmut qarasaasiatigut piginnaasaqarnissaq pisariaqarpoq. Aammali tunillatsissimasinnaasunik misissuinermik suliaqarnissaq. Taakku peqqinnissamut tunngatillugu piginnaasaqarnissaat immikkut pisariaqarpoq, Henrik L. Hansen oqarpoq.

AAMMA ATUARUK Naalakkersuisut: Ulluni tallimani angerlarsimanissaq pingasunngornermit piumasaqaataalersoq

Kommuneqarfik Sermersooq misissuivissamut nutaamut sulisussarsiorluni sulisuni mailikkut allagaqarfigai.

- Kommunimi peqqinnissaqarfimmilu sulisut suleqatigiillutik suliaqassapput. Tamanna piffissami matumani inissaqartitsinermit annerusumik qulakkeerissutaassaaq. Danmarkimimi Islandimilu tunillaassuuttoqangaatsiarnera pissutigalugu misissorteqqittoqartarnissaanut tikittullu angerlarsimaannarallartarnissaannik atulersitseqqinnikuuvugut, nakorsaaneq oqarpoq.

Nuummi tunillaassuuttoqaleqqinnissaanut piareersartut

Illoqarfiup qeqqani misissuivik peqqinnissaqarfiup misissuisinnaassusaanut tapertaassaaq. Covid-19-imimmi tunillaassuuttoqalissagaluarpat misissuinermi periuseqarnermi siuarsimanissaq pingaaruteqartoq nakorsaanerup oqaatigaa.

Landslæge Henrik L. Hansen Nakorsaaneq, Henrik L. Hansen

- Dronning Ingriup Napparsimmavissuani inissaqartitsineq naammanngilaq. Nuummi covid-19-imik ilimanarluinnarsinnaasumik tunillaassuuttoqaleqqinnissaanut piareersarpugut, nakorsaaneq oqarpoq.

- Tunillaassuuttoqarfiunerani amerlasoorujussuit piffissap sivikitsup ingerlanerani misissorsinnaanissaannut piareersimassaagut. Taamaattoqarnissaanullu sukkasuumik sunniuteqarluartumillu aaqqissuussinikkut piffissap sivitsup iluani misissuisinnaanissarput pisariaqarpoq.

AAMMA ATUARUK Tamaat isigalugu: Coronavirus pillugu killiffik

Misissuiviit assigannik Danmarkimi tupersuarni peqarpoq. Periarfissarlu taanna nunatsinni periarfissaanngitsoq nakorsaanerup oqaatigaa.

- Ukioriartupiloorpugut. Misissortittussat annermillu sulisut eqqarsaatigalugit inissiamik kiassarneqarsinnaasumik nassaarnissarput pisariaqartoq nalilerparput.

Sapaatini akunnerni tulliuttuni ammassasoq

Misissuivik qaqugu ammassanersoq nakorsaanerup ullulernianngilaa. Sapaatinili akunnerni qaninnerusuni ammarsinnaanissaa neriuutigalugu oqaatigaa.

Misissuiviup ammasarfissaa aamma aalajangersorneqanngitsut, nakorsaanerup nassuiaatigaa.

Tamanit ilummut isiginnaartoqarsinnaannginnissaa pillugu pisariaqartumik assersuisoqassaaq.  

- Pisariaqartitsinerup qanoq innera apeqqutaalluni ammasarfeqassaaq, pissuseqataanillu tunillaassuuttoqalissagaluarpat sivisuumik ammasarnissaata pisariaqarnissaa siulittorsinnaavarput, nakorsaaneq oqarpoq.

- Illup ilusilersorneranut annikitsumik allannguuteqartoqassaaq, taamaalilluni sunniutigineqartumut naleqqussarneqassalluni. Tamanit ilummut isiginnaartoqarsinnaannginnissaa pillugu pisariaqartumik assertuisoqassaaq.

Peqqinnissaqarfiup misissuinermik illersuutinillu atuinermik ilinniartitsineq isumagissavaa.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat