Kalaaliaraq sulisuerutilerpoq

Ilulissani Kalaalimineerniarfiup sulisui pingasut suliunnaarsillugit, kalaaliminernik tuniniaaneq piniartunit nammineq ingerlanneqaqqittalissasoq Qaasuitsup Kommuniata ukiortaamit atuuttussanngorlugu aalajangiuppaa.

Kalaalimineerniarfiup kommunimit ingerlanneqaleratigut pitsaaqutit anguneqarsimasut annaaneqassasut Qaasuitsup Kommuniani Siumup gruppiata ernumatigaa.

- Tassa uagut taanna Siumuminngaanniit akerleralugu kommunalbestyrelsimi kingullermik ataatsimiinnitsinni eqqartorparput. Aamma aningaasaqarnermut ataatsimiisitaliamut qaqereernikuuarput. Tassa kisianni ajoraluartumik taanna aalajangerneq aalajangiusimaannarneqarsimavoq, Palle Jerimiassen, Qaasuitsup Kommuniani Siumut sinnerlugu kommunalbestyrelsemi ilaasortaq oqarpoq.

Taassuma orniginartinnerungaluarpaa Kalaalimineerniarfiup namminersortunit tiguneqarnissaa.

- Kisianni aamma imatut aaqqiisoqarsinnaangaluarpoq massakkutut ingerlanera ingerlatiinnarlugu,  nalunnginnakku namminersortunit aamma tiguserusuttoqartoq. Taakkua tigusinissaannut isumaqatiginiarsinnarlugit aatsaat matuneqarsinnaavoq, imaluunniit allamut nuunneqarluni ingerlaannartinneqarsinnaagaluarpoq massakkut matusinnissaq pinnagu, Palle Jerimiassen oqarpoq.

- Qaasuitsup Kommunianut piareersarnitsinni aalajangerneqarnikuuvoq tuniniaatitsiviit Ilulissanituut aaqqissuunneqarlutik pitsanngorsarneqarnissaat. Taanna siunertaanikuuvoq. Massakkulli taanna qimallugu taamatut aaqqiiniarneq isumaqatiginngilluinnarparput uagut Siumuminngaanniit, Palle Jeremiassen oqarpoq.

Ilulissani Kalaalimineerniarfiup sulisui suliunnaarsillugit, piniartut namminneq tuniniaasalernissaat pillugu Qaasuitsup Kommunianit oqaaseqartitsiniaraluaratta, sulinngiffeqartoqarnera pillugu oqaaseqartitsisinnaasimanngilagut.