Kalaaliaqqat tusaamasamik nuusioqateqalersut
Ole Kibsgaardip upernavimmiuaqqat CD-lioqatissani Red Barnetip meeqqat ornittagaanni illumi naapissimavai.
Ole Kibsgaardip kalaallit meerartaanut atuagaaqqamik assiliartalimmik suliaqarnissa Red Barnetip aallaqqaammut kissaatigisimagaluarpaa. Nipilersortartuugamili meeqqat illumut orniguttartut namminneq misigisaminnik taalliornissaat isumassarsiarigamiuk siunniutiinnarsimavaa.
- Meeqqat ornittagaannut oqalutsilu inisseriarluta meeqqat ulluinnarni atukkatik pillugit taallioqquakka, asulu taalliaat sakkortunaaqalugit. Nukappiaqqat naalanngitsuaqqat fiisternilersaarput, niviarsiaqqallu amerlanerit asanninneq pillugu taalliorlutik. Ilaasali ataatartik toqoreernikoq allaaserimmassuk Upernavimmi politiit ilaanut qallunaajusumut allatat ilaat takutikkakku, taanna allatut ajornartumik qullilivoq. Ilami taalliarineqartoq tussunngunarnermik. Niviarsiaqqammi allatani sinnassaatitut ilusilerlugu allassimavaa, ataatanilu taalliamini sinilluaqqullugu, Ole Kibsgaard oqaluttuarpoq.
Red Barnet Qaanaami Upernavimmilu meeqqat toqqissisimallutik ornissinnaasaanik klubbiliortitsisuuvoq.
Red Barnetip neqeroorutaa meeqqat inuusuttuaqqallu 100-t ullut tamarluinnaasa atorluartarpaat, 2002-milu periarfissaalersimalluni.
CD-q upernavimmiuaqqat 14-nik erinartaliuussimasaat maajip naanerani saqqummissaaq, Upernaviullu timersortarfissuani maajillu 30-anni tusarnaartitsisoqarumaarluni.
