Kalaaliaqqat Danmarkimi oqartussanit sumiginnarneqartarput
Aallakaatitassiami pineqarput peqatigiiffiup Foreningen Grønlandske Børnip akuunerulersitsinissaq siunertaralugu, kalaallinut anaananut imaluunniit ataatanut kisimiittunut suliniutaa.
Naak meeqqat suliniummi pineqartut 80-iusut amerlanersaat, inunnik isumaginnittoqarfimmit ilisarisimaneqanngikkaluartut, meeqqat ilarpassui ima atugarissaanngitsigipput, peqatigiiffik taakku pillugit kommunimut saaffiginnittariaqarsimalluni.
Suliniutip ukiuni sisamani atuunnerani suliniummi suleqataasut kommunimut saaffiginnissutinik 89-inik allattariaqarsimapput.
Tamatuma kinguneranik meeqqat 61-it angerlarsimaffimminnit peersinneqanngikkaangamik kommunimit tapersersorteqalersarput, imaluunniit Danmarkimi kommuneqarfigisaminnit immikkut ilinniagalinnit ikiorserneqartarlutik.
- Matumani paasinarsivoq, meeqqat imaannaanngitsunik ajornartorsiuteqarsimasut, aamma meeqqat ilaqartut oqartussanit sumiginnarneqartartunik, Danmarkimilu atuarfinnit sullissivinnillu allanit maluginiarneqanngitsoortartunik, Sissel Lea Nielsen peqatigiiffimmit Foreningen Grønlandske Børnimeersoq oqarpoq.
Kalaallit meerartaat 1.000-it missaanniittut inooqatigiinnikkut ilungersunartunik ajornartorsiuteqartut, immikkut ilisimasallit naliliipput.
Radiukkut aallakaatitassiaq piviusulersaarut Danmarks Radiomi program 1-imi ullumi nalunaaqutaq 10.03 tusarnaarneqarsinnaavoq, aallakaateqqinneralu pissalluni arfininngorpat nalunaaqutaq 11.03 aamma sapaatiuppat nalunaaqutaq 16.03.