Kalaaliaqqat Danmarkiliartinneqartut pillugit suliaq ministerit suliarissavaat

Ataatsmiititaliap ataatsimeereernerata siulliup kingorna Inuit Ataqatigiit sinnerlugit Folketingimut ilaasortaq, Juliane Henningsen taama ilisimatitsivoq.

Meeqqat kalaallit 22-t ilaqutaannit avissaartillugit misiliutitut 1950-ikkunni Danmarkiliartinneqarsimanerat Radioaviisimit sammineqarmat Kalaallit Nunaanni Danmarkimilu oqallittoqangaatsiarpoq, meeqqallu taamanikkut Danmarkiliartinneqarsimasut ilaasa pisortatigoortumik utoqqatserfigineqarnissartik piumasaraat. Folketingimi Kalaallit Nunaannut ataatsimiititaliaani danskit kalaallillu politikeriisa qaqilerneqarnissaa piumasarisimavaat. Maannakkulli ministerinut suliassanngortinneqarpoq. Tassami naalakkersuisut siulittaasuata Kuupik Kleistip aamma ministeriunerup Lars Løkke Rasmussenip pisimasoq pillugu isumaqatigiinniartussanngormata, qanoq ilillugu pisimasoq inernilerneqarsinnaanersoq isumaqatigiinniutigisussanngorlugu.