Kalaaliaqqat balletimik qitittartut Den Kongelige Balletskolemut qaaqqusaapput
Meeqqat Nunatsinneersut tassunga pulaarnissaat immikkuullaritsuusoq, qitittartut ilinniartitsisuata qitittarfiullu, Qiajuk Studiosip pisortaata, Ruth Montgomey-Andersenip oqaluttuaraa.
- Den Kongelige Balletskolemit kalaallit immikkut siornatigut ilinniartinneqarnissaannik qaaqqusaanikuunngisaannarput aamma Danmarkimi qitittartut ikittuinnaat tamanna misigisimavaat.
Qiajuk Stusiosimi pisortaq Ruth Montgomery-Andersen oqarpoq.
Balletertarnerup Nunatsinni siuarsarneqarnissaa neriunarpoq
Nunatsinni balletimik qitittarnerup siuarsarneqarnissaa, Ruth Montgomery-Andersenip aamma Det Kongelige Teaterip balletimik ilinniarfiup Kompani B-p pisortaata, Ann Crossetip 2013-imili suliaralugu aallartippaat.
Nunatsinni balletimik qitittartut Den Kongelige Balletskolemit ilinniartinneqarnissaat, siunissami inuussutissarsiutigalugu qitittartuunissamik tunaartaqanngitsoq, Ruth Montgomery-Andersenip oqaatigaa, taamaattorli balletimik qitittartuunerup qanoq ittuussusaanik paasiniaanerusoq oqaatigalugu.
- Balletip qanoq sumullu atorneqarnissaa meeqqanut paasitinneqassaaq aamma paasitinneqassalluni timi qitinnerlu atorlugit, balleti qanoq atorneqarsinnaanersoq taamatullu qitimmut takkusunga qanoq pikkoritsigilersoqarsinnaanersoq paasitinneqassalluni.
Den Kongelige Balletskolenimut pulaarneq tamanna siunissami suleqatigiinnissamut alloriarnerussasoq siulleq, Ruth Montgomery-Andersenip neriuutigaa.
- Neriuutigaarput meeqqat balletimik qitinnermik nuannarisaqartut siunissami ilinniartinneqartalerumaartut pikkorilluinnartunik ilinniartitsisoqarlutik.
Qitittartoq Qiajuk Studiosimillu pisortaq, Ruth Mongomery-Andersen taama oqarpoq.
Meeqqat Kalaallit Nunaanneersut arfinillit, ullumimiit, tassa marsip 30-niit aprilip arferngata tungaanut Den Kongelige balletskolemi ilinniartinneqassapput.