Kalaaliaqqat atugarisaat isornartorsiorneqarput
Konservativit Kalaallit Nunaat pillugu oqaaseqartartuat, Per Ørum Jørgensen, taama isumaqartoq, Sermitsiap nittartagaani ullumi atuarneqarsinnaavoq.
- Kalaaliaqqat atuartut 17 procentiisa kaallutik unnukkut innartarnerat kanngunartuliornerullunilu akisussaassuseqanngitsuliorneruvoq, Per Ørum Jørgensen oqarpoq.
- Meeqqat kinguaassiuutitigut atornerlunneqartarnerat, kaallutilluunniit innartariaqartarnerat, oqartussaasullu iliuuseqanngittuarnerat, akuersaaginnarsinnaanngilarput. Inuiaqatigiit sanngiinnerit avataaniit qanoq iliuuseqarfigineqartarnerata inuiaqatigiinnit naliliiffigineqartarnissaa Konservativit aallaavigaat, meeqqallu pisariaqartitaat soorunami pingaarnerpaavoq, Per Ørum Jørgensen tikkuaavoq.
Kalaallit Nunaannut ataatsimoortumik tapiissutit ilaat inunnut ajornartorsiutilinnut, pingaartumik meeqqanut amerlasuunut tunngassuteqartunut, immikkoortinneqartarsinnaannginnersut Konservativit maanna misissuiviginialerpaat.
