Kalaaliaqqat allanit tamanit siullerpaallutik atoqateqalersarput

juunip 16-at 2005 05:08

Meeqqat atuarfianni atuartut peqqissusaannik Kulturimut Ilinniartitaanermullu Pisortqarfiup misissuinerani erserpoq, nunatsinni meeqqat atuarfiini atuartut nunanut allanut naleqqiullutik ukiukinnerpaallutik atoqateqartalersartut. Misissuinerup inernerata sapaatip-akunnerani kingullermi saqqummiunneqartup tamanna ersersippaa. Kalaallit 16-inik ukiullit 75 procentii atoqateqartarput.

Nunarsuarmi meeqqat atuarfiini atuartut ukiukinnerpaallutik atoqateqartalersartut siulliit tulliatut inissisimavoq Tuluit Nunaat. Tassani 16-inik ukiullit 38 procentii atoqateqartarput. Atoqateqartarneq nunani tamalaani agguaqatigiisillugu appasinnerungaatsiarpoq, 24 procentiugami.

Atuartut 13-inik ukioqarlutik atoqateqartalersimasut misissuinermittaaq paasineqarpoq, atuartulli amerlanerpaartaat 14-inik 15-inilluunniit ukioqarlutik atoqateqaqqaartarput. Inuusuttut atoqateqaraangamik naartunaveersaasernissartik eqqaamarpiarneq ajorpaat.

15-inik ukiullit affaannaasa kingullermik atoqateqarnerminni usuup puua atussallugu eqqaamasimavaat. Akerlianilli nivissat 15-inik ukiullit 60 procentii p-pille-tortuullutik.

15-inik ukiullit atoqateqartalereersut sisaagaangata ataaseq naartunaveersaateqanngisaannarpoq.