Kalaaliaqqami pisiassat amerlilerunarput
Aalisartut piniartullu minnerunngitsumillu atuisut, Nuummi kalaalimineerniarfittaaq kalaaliminernik tuniniaanermut akornutaasutut pisuutikkaluarpaat. Taama isummersornermut pissutaavoq nerisassanik tuniniaanerup sakkortusineqarnerata kinguneranik taamaallaat suliarereriigaanngitsunik tuniniaasoqaqqusaalermat.
Doris Jakobsenip Siumumeersup aamma Astrid Fleischer Rexip paragraf 37 najoqqutaralugu apeqqutaannut akissummi tamanna ammaanniarneqartoq malunnarpoq.
Inuussutissarsiornermut naalakkersuisup Ove Karl Berthelsenip akissummini oqaatigaa, Inatsisartut ukiakkut ataatsimiinnissaannut allaannguutissamik siunnersuuteqartoqarniartoq.
- Kisiannili maannakkut inissisimaneq eqqarsaatigalugu, nalunaarummik allannguinissaq tuaviortumik tusarniutitut nassiunneqassasoq ilimagineqassaaq, taamaalilluni nerisassat suliareriikkat kalaaliaqqami nioqqutiginissaat periarfissaqalissammat, kisianni atuisunut nerisassat pitsaassutsimikkut isumannaatsuunissaat pingaartillugu, Ove Karl Berthelsen taama allappoq.
Nioqqutissiat sorpiaat pineqarnersut akissummi taaneqanngillat.
Nuummi kalaalimineerniarfittaarneratigut aalisakkat neqillu qerisut, pujuukkat panertullu tuniniagaajunnaaraluarput. Inatsisitigulli suliareriikkanik nioqquteqarnissaq inerteqqutaajuaannarsimavoq - erisarnerit, saliinerit uullisimasullu eqqaasanngikkaanni.
Matumani assigiinngissutaa tassaavoq, Kommuneqarfik Sermersuup inatsit taanna atuuttoq maanna malinniarlugu aallartissimammat. Maannali inatsit taanna misissoqissaarniarneqalerpoq.