Kalaalerpassuit ilinniagaqareermata tulluusimaarnaqaaq
Kalaallit inuiaqatigiit ilinniartitaanerat Danmarkimi inuiaqatigiit ilinniartitaanerattulli piffissaq sivisooq immaqa aatsaat ingerlareerpat pitsaatigilissaaq. Tamannalu danskit politikeriisa ilisimatusartuisalu ataqqisariaqarpaat.
Eskimologiimut ukiut pingajussaa atuartoq, Elionora Jakobsen, taama isumaqarpoq.
Kalaallit Nunaata siunissaa pillugu Issittuni pissutsinik ilisimatusarfimmi, tassa Dansk Polarcenterimi, Københavnimiitumi, ippassaani oqallittoqarmat Elionora Jakobsen peqataavoq. Naminersorneq pillugu ataatsimiititaliarsuarmi ilaasortat arlallit oqallinnermi aamma peqataapput.
Nunatsinni iliniartitaanerup ingerlanneqartarnera tassani ilaatigut aamma oqallisigineqarpoq.
- Danskit ilisimatuut politikerillu naammagittartariaqarput. Kalaallit Nunaat ilinniartitaalereerpoq. Kalaalerpassuit manna tikillugu ilinniagaqareerput, inuiaallu piniarnermik inuussutillit taama amerlatigisut piffissami taama sivikitsigisumi ilinniagaqarsinnaammata nersortariaqaqaat, Elionora Jakobsen oqallinnerup kinguninngua oqarpoq.
Issittuni pissutsinik Ilisimatusarfimmi, Dansk Polar Centerimi, oqallinnermi namminersorneq pillugu ataatsimiititaliarsuup ilaasortai Folketingimilu ilaasortat peqataapput, Villy Søvndal, SF-imeersoq, Frank Jensen, Socialdemokratineersoq aamma Niels Helveg Petersen, Radikaleneersoq peqataallutik.
