Kalaaleq Århus Kunstbygningimi saqqummersitseqataalerpoq
Arnat pisinnaatitaaffinnik ilungersuuteqarnerat 60-ikkunni 70-ikkullu aallartilaarnerann pereersoq arnat inuiaqatigiinni aammalumi imminnut isiginnerat allanngorsimaqaaq. Allanngornerillu tamakku Århus Kunstbygningimi aasaanerani saqqummersitsinermi ersersinniarneqarput.
- Eqqumiitsuliortut saqqummersitsisussatut toqqarnerannut pissutaavoq ammaanniaratsigu eqqumiitsuliortut suiaasusermik kinaassutsimillu ersersitsinerat. Taakku matumani takutippaat ataasiinnarmik isiginnittaasillit allat isummiutsitaannik pigiliussisarnerat tamatuminngalu eqqarsaatiginngikkarlugu arnat akuersiinnarsimasutut ittarnerat imminnut oqaluttuarileraangamik, Århus Kunstbygningimi aqutsisoq Rie Hovmann Rasmussen oqarpoq.
Saqqummersitsineq juunip 23-ianiit septemberip 16-ianut takuniarneqarsinnaavoq tassanilu ilaatigut takuneqarsinnaavoq arnat kinaassusaannut tamakkiisumik isiginneriaatsimut kulturikkut inuiaassutsikkullu assigiinngissutit sunniuteqarnerat.
Rannvà Holm Mortensen (FO) aamma Jessie Kleemann nammineq inuttut misilittakkat atorlugit kalaallit savalimmiormiullu nunasiaataasimasutut kinaassusaat pillugu oqallinneq ammarniarpaat. Paasinittaatsip oqallisissatut saqqummiunneratigut inuttut atukkanut kulturimullu nunasiaasimanerup sunniutai oqallissaarutigineqarput. Tamannalu pivoq qallunaat nunasiaateqarsimanerat pillugu oqallinnerup tammakarsimaffiani taarsiullugulu inuiaassutsip oqallisaaneruffiani, Rie Hovmann Rasmussen oqarpoq Århus Kunstbygningimi aqutsisutut saqqummersitsinissaq aaqqissuutereerlugu.
