Kalaaleq ujarassiooq rubinit suminngaanneerpiarnerinut uppernarsaatissarsiortoq
Nittartagaq videnskab.dk taama allaaserisaqarpoq.
Ujaqqammi nunamit sorlerminngaanneernerinik takussutissarsinikkut, ujaqqanik erlinnartunik nunatsinneersunik niuerfimmi nalitunerulersitsisinnaassaaq, ujarassiooq Majken Djurhuus Poulsen, GEUS-ip Nuummi allaffiani sulisuusoq taama oqaluttuarpoq.
Rubinip qanorpiaq pinngortarnera Ph.d-nngorniutiminut atatillugu ilisimatusaatigaa.
Rubininik niuerfimmi tunisassioriaatsit assigiinngitsorpassuit atorneqartarput, ilaatigullu meeqqanik sulisoqartoqartarnera, avatangiisinik mingutsitsisoqartarnera kiisalu rubininik pitsaanngitsumik suliarinnittoqartarnera unnerluutigineqartarluni.
Uppernarsaatissarsiortut
- Rubini sananeqaatsimigut ujaqqap suminngaanneerpiarneranik takussutaasinnaasumik peqarnersoq paasiniarsaraarput, Majken Djurhuus Poulsen oqaluttuarpoq.
Ujaqqap suminngaanneerneranik nalilersueriaatsimik qularnaatsumik nassaarniarluni misissuinerit Namminersorlutik Oqartussanit GEUS-imillu aningaasalersorneqarput. Taamaaliornikkummi rubinit nunatsinneersutut nittarsaanneqarsinnaanngussammata ujaqqallu erlinnartut taamaalillutik naleqarnerulerlutik.
Rubinit suminngaanneerpiarnerannik nalileeriatsimik nassaartoqarsinnaanissaa True North Gemsip Nuummiittup pisortaata, Bent Olsvigip neriuutigaa, taamaaliornikkummi rubinit nunatsinneersut ujaqqanik tuniniaaqqittussanut niuerfimmi pitsaasumik inissisimalersinnaassammata.
- Rubinimmi suminngaanneerpiarnera uppernarsarneqarsinnaalerpat rubinit Kalaallit Nunaanneersuunngitsut Kalaallit Nunaanneersuunerarneqarsinnaajunnaassapput, Bent Olsvig videnskab.dk-mut taama oqarpoq.