Kalaaleq toqutsisutut unnerluutigineqarpoq
Arnaq taanna Viborgip eqqaani tatsip Hald Søp eqqaani atisaajarneqarsimalluni savimmik toqunneqarsimasoq pingasunngormat nassaarineqarpoq. Arnap taassuma unnerluutigineqartoq marlunngormat unnukkut biileqatigisimavaa.
Angutip unnerluutigineqartup ujarneqarneranut atatillugu, aqqa assingalu tamanut takusassiarineqarmata, kinaanera ilisimaneqareerpoq. Biilinik malersuuttoqareersorlu angut ippassaq tigusarineqarpoq, tamatumanilu ajoqusingaatsiarnini pissutigalugit ullumi killisiuinermi najuussinnaanani. Nalunaarutigineqartut kingulliit naapertorlugit angut inuunerminik ulorianartorsiunngilaq, ilisimajunnaaqqasorli uumatinniarneqarluni.
Angut 39-nik ukiulik taanna, isornartorsiorneqaqisumi meeqqat 22-usut 1951-imi Misiligummik Danmarkiliartinneqartut ilaata erneraa. Arnaa, 1974-imi toqutaanissami tungaanut tallimanik, tamarmik meerarsianngortinneqartunik meeraqarpoq. Angutip qatanngutaata maanna Nunatsinni najugaqartup Danmarkimi tv-avisimut ippassaq oqaatigaa, pisimasup taassuma kingorna angut pinerlunniartalersimasoq.
Angut piffissaligaanngitsumik tarnimigut katsorsagassanngorlugu inissinneqarsimavoq. Aviisimi BT-mi allaaserineqarnera naapertorlugu, angutip pineqaatissiissutigisarsimasai tassaapput tillinniarneq, sakkoqarsinnaanermut inatsimmik unioqqutitsineq, ikuallatsitsineq aamma sakkortuumik nakuuserneq.
Viborgimi eqqartuussiviup angut toqutsisimasutut, sakkortuumik pinngitsaaliilluni arnerisimasutut imaluunniit pinngitsaaleeriarsimasutut aamma biilinik marlunnik tillissimasutut unnerluutigaa. Angut marsip qulingiluaata tungaanut tigummineqarallartussanngortitaavoq eqqarsartaatsimigullu misissorneqassalluni.
