Kalaaleq sikkilerluni Danmarkimi pissartanngortoq

Kalaaleq 20-nik ukiulik sikkilerluni sukkaniuttartoq Ricky Enø Jørgensen, unammisaleramili ullumi aatsaat taamak angusarissaartigaaq.
Allattoq Elisa Isaksen
maajip 30-at 2010 13:21

Tassami Ricky Enø Jørgensen U23 linieløbimik taaneqartumi, Randersip eqqaani ingerlanneqartumi Danmarkimi pissartanngorpoq.

Timersoqatigiit Kattuffiata nittartagaani gif.gl-imi tamanna oqaluttuarineqarpoq.

Sikkilerlutik sukkaniuttartut kaajallatassaq 11,3 kilometerinik isorartussusilik arfinileriarlugu kaajallattussaavaat. Tassa katillugit 180 kilometerit missaannik isorartussusilik.

100 kilometerit missaat ingerlareerlugit Ricky Enø Jørgensen unammeqatinilu marluk siuartuupput aatsaallu apuutingajalerlutik Ricky Enø Jørgensen siuarpoq, normu 2-millu 2 sekundinik siulliulluni apuulluni.

Ricky Enø Jørgensen, Ilulissani inunngortoq, Danmarkimi sikkilinik sukkaniuttartoqatigiinnut Glud & Marstrandikkunnut ilaasoq, maanna U23-ni Danmarkimi mesterinngorpoq.