VIDEO Kalaaleq sakkutooq kunngikkormiut umiarsuaannik malinnittuuvoq

Sakkutuunut 52-inut arfininngorneq, arfininngornernit allanit allaaneruvoq. Ataqqinartorsuarmi sakkutuunut qujaniarpoq nunatsinni angalanerminni Dannebrogimut paarsisuulluarmata. Qujaniarfigisaasa ilagaat Nanortalimmiu Miki Petrussen 26-inik ukiulik.

- Ulapeqigatta massakkut, dronningi malillugu ikiortarlugulu, taava freerfini atorlugu aggermat assut tuppallernaqaaq, nuanneqaaq, Thetisimi inuttaq Miki Petrussen KNR-imut oqarpoq.

Miki Petrussen ukiuni arfineq pingasuni sakkutuujuvoq, sakkutuujunerlu nuannareqaa.  

- Assut angalanikooqaanga nunarsuaq tamakkerlugu, sulitillunga freertillungalu. Assut nuannarivara taanna periarfissarilernikuugakku, Miki Petrussen oqarpoq.

Ullormut suliat assigiinneq ajorput.

- Ulluinnarni saqisuuvunga maani. Kisianni aamma saniatigut suliat, suliarisartagakka amerlaqaat maani umiarsuarmi. Allagartaqaqaanga assigiinngitsunut maani umiarsuarmi atortagannut, Miki Petrussen oqaluttuarpoq.

Miki qaammatit marluk suleriarluni qaammatit marluk sulinngiffeqartarpoq, ilaquttat ikinngutillu taamak sivisutigisumik qimaqqasarlugit sakkortusinnaasarpoq. 

- Nalliuttoornerit, juullisiornerit tamakku ullorsiornerit amerlasuukuluut peqarneq ajorpunga sulinera pissutigalugu. Taanna sakkortulaartarpoq aamma, Miki Petrussen oqarpoq.

Miki kalaallinut sakkutuungorusuttunut ima kajumissaarivoq.

- Kalaallit tamarmik 18-ininngaanniit 26-nut ukiullit sakkutuunngorniarnissaminnut qinnuteqarsinnaapput. Nalunngilara massakkut kalaallinik assut pissarserusuttut, Miki Petrussen oqarpoq.

Sakkutuut angallataani Thetisimi kalaallit marluupput.