Kalaaleq niviarsiaraq Bodilimik akissarsisinnaavoq

Qallunaat filminik isornartorsiuisartut, filmiaritillaqqinnerpaanut akissarsiaritittagaat Bodilimik taaneqartartoq, unnugu agguaanneqalerpat kalaaleq niviarsiaraq, Laura Skaarup Jensen, akissarsitinneqartussatut innersuussanut ilaavoq.
februaarip 20-at 2011 12:59

Laura Skaarup Jensen filmimi 'Eksperimentimi' niviarsiaqqatut Karenimik atilittut peqataavoq.

Akissarsisitsitsisoqannginnerani Laura Skaarup Jensen KNR-imit oqaloqatigineqarami eqqissisimaqaaq.

- Ajunngeqaanga. Eqqarsaatigivallaanngilara. Innersuunneqarnera nuannaarutigiinnarpara, oqarpoq, Bodilinnannissaminullu ilimasuppallaanngilaq. Bodilinnattussatut ilimagaa Paprika Steen, filmimi "Alting bliver godt igen"-imi pingaarnertuunngikkaluaq inuttaasoq.

Laura Skaarup Jensen 14-iinnarnik ukioqarluni filmimi Eksperementimi inuttaagami filminik isornartorsiuisartunit nersualaarneqaqaaq. Angajoqqaanilu Jyllandip avannaani najugaqarput, Qasigiannguanili peroriartorluni.

Bodilimik akissarsitinneqartussatut kalaallimik aappassaa innersuussisoqarpoq. Tassa filmi "Qaamarngup uummataa" 1999-imi takutinneqarmat Rasmus Lyberth, pingaarnertut inuttaasoq, Bodilinnattussatut piukkunneqaraluarpoq. Kisianni Ulrich Thomsen ukioq taanna akissarsitinneqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq