Kalaaleq målmandiussaaq
Assakaasulinnik issiavillit isikkamik arsaallutik nunarsuaq tamakkerlugu tallimanngorpat Japanimi pissartanngorniutilerpata, Dan Kúnak Lund Illoqqortoormiuneersoq danskit nunanut allanut unammisartui peqatigalugit peqataassaaq.
Timimigut innarluutilik taanna 28-nik ukiulik pissartanngorniunnermi målmandiussaaq.
Danskit nunanut allanut unammisartui allat peqatigalugit Japanimi pissartanngorniunnermi bronzennannissaq Dan Kúnak Lundip neriuutigaa.
- Naalagaaffiit arfineq-marluk unammissavavut, anguniassavarpullu normu 4-tut 5-itulluunniit inissinnissarput, bronzennassagaluaruttali aamma ajorinavianngilarput, Danmarkimi Innarluutilinnut Timersortartut Kattuffiat sinnerlugu angalasussat pisortaat, Rasmus Lond oqarpoq.
Rasmus Londili isumaqarpoq, pissartanngorniuteqataasussat tamarmik saqqarmiortaanngikkaluarunilluunniit ajugaasutut taaneqarsinnaasut:
- Oqarsinnaavugut arfineq-pingasuulluta peqataaniarnerput pissutigalugu ajugaasutut inissereerluta, timitsigummi innarluuteqaraluarluta Danmark sinnerlugu nunarsuup illuatungaanut angalavugut. Attaveqaqatigiissuuvugut pissanganartut, Rasmus Lond oqarpoq.
Assakaasulinnik issiavillit isikkamik arsaallutik nunarsuaq tamakkerlugu pissartanngorniunnerat oktobarip 16-iata tungaanut ingerlanneqassaaq.