Kalaaleq meeqqamik atornerluisimasutut unnerluutigisaasoq
Angut qallunaaq 49-nik ukiulik panimminik marlunnik kinguaassiutitigut atornerluisimasutut aningaasanillu akilersilluni angutinut allanut atortitsisarsimasutut unnerluunneqarpoq. Niviarsiaqqap aappaa arfineq-pingasuinnarnik ukioqarluni kinguaassiutitigut atornerlunneqarpoq.
Angutit katillugit sisamat suliamut atatillugu unnerluutigisaapput, taakkununnga ilaalluni angut kalaaleq 54-inik ukiulik.
Angut taanna 2001-imili Danmarkimi najugaqarpoq,Vejlemilu imigassamik atornerluisut akornanni ilisarisimaneqarluartoq, Ekstra Blademi allaaserineqarpoq.
Angut unnerluussummut pisuunnginnerarpoq.
Suliaq politiinit 2009-mili suliarineqarpoq, angut kalaaleq niviarsiaqqamik arfineq-pingasunik ukiulimmik kinguaassiutitigut atornerluisimasutut qatanngutaanilli 15-inik ukiulimmik, ataataata kaammattuineratigut, atoqateqarsimasutut unnerluunneqarluni qaammatip aappa avillugu taamani tigummigallagaavoq.
Unnerluutigineqartunik eqqartuussineq Koldingip eqqartuussiviani oktobarimi pissaaq.