Kalaaleq Japanimi ajunngilarooq

Taakku ilagaat kalaaleq, Joachim Jørgensen, 23-nik ukiulik, Japanimi maanna ilisimatusartoq.

Japanip oqaluttuarisaanerani aatsaat taama sakkortutigisumik nuna sajuppoq.

Joachim Jørgensen Japanimi ilisimatusartoq KNR-imit ullaap - tungaa oqaluupparput.

Oqaluukkatigu ajunnginnerarpoq, oqaraasuaatimili angallattakkap sarfaarutilernera pillugu kingusinnerusukkut attavigineqarnissani piumasaralugu.

Qatanngutaa, Camilla Siezing, Kalaallit Nunaanni najugaqartoq, oqaloqatiginerani paasivarput tsunamimut mianersoqqussummik tusagaqarsimasut, taamaattumillu illoqarfigisaminni qaqqamukarsimasut, tassa qutsinnerusumukarsimasut.

Joachim Jørgensen ajunngitsoq, kiisalu tsunaamimut mianersoqqusinermi siunnersuutit malilluarai, aleqaata Camillap oqaatigaa.

Japanimi nunap sajunnerata annertuup kingorna maannalu tsunamimut mianersoqquffiusumi najugaqartumik qatannguteqarluni isumaalunnartoq Camilla Siezing oqarpoq.

Joachimip Jørgensen kingusinnerusukkut oqaluttuartissinnaassallugu naatsorsuutigaarput.

Oqartussanit nalunaarut

Namminersorlutik Oqartussani Nunanut allanut allattoqarfimmi allaffimmi pisortaq Mininnguaq Kleist ima ilisimatitsivoq.

- Japanimi nunap sajunnerata kingunerisaanik Kalaallit Nunaanneersunik eqqugaasoqarsimanersoq pillugu tusagaqanngilagut, aamma nunanit Manerassuarmi tassaarnersuarmit eqqugaasuni kalaaleqarnersoq maannamut tusagaqarnata. Ilisimatitsissutigissavarput maqaasisaqartoqaruni maani allaffeqarfitta ammanerata nalaani nunanut allanut allattoqarfimmut saaffiginnittoqarsinnaammat, ajunnginnerpaassaarli Danmarkimi Nunanut allanut tunngasuni Qullersaqarfimmi innuttaasunik sullissivik (Borgerservice) toqqaannartumik attavigigaanni, taakku danskisut innuttaassusillit tamaasa sullittarpaat, ujaasisoqassappallu isumagissallugit, sianerfissaq tassaavoq 0045 33 92 11 12, Mininnguaq Kleist ilisimatitsivoq.