Nunanit allanit

Kalaaleq Istanbulimiittoq: Maaniiginnarnissara nalornissutigaara

Tyrkiami præsidenti Recep Erdogan arfininngormat uppiteriarneqaraluarpoq, pisinnaatitaaffiisoqaannassappallu, kalaallip Tyrkiap illoqarfiisa pingaarnersaanni Istanbulimi tuluttut atuartitsisup, Piitaq Samuelsenip Tyrkiamiiginnarnissani takorluunngilaa.

Allattoq Jonas Fievé

juulip 21-at 2016 07:42

Nutserisoq Sara K. Jakobsen

- Uannut aamma eqqarsaatigisariaqarama, taamatullu pisoqassappat, piaarnerpaamik aqqutissarsiortariaqassaanga, Istanbulimi najugaqartoq Piitaq Samuelsen oqarpoq.

Tyrkiap naalagaaffia sukannersumik aqunneqalissappat naalagaaffimmi atuuffillit Tyrkiamit aneqqusaajunnaassapput. Piitaq Samuelsenillu nuliaa naalagaaffiup suliffeqarfiutaani ilinniartitsisutut atorfeqarnini pissutigalugu aneqqusaajunnaarsinnaammat, tamanna Piitamut aporfiliivoq.

Aamma atuaruk Ministeriuneq: Tyrkiami sakkutuut pissaanermik tiguaariarput

Aamma atuaruk Tyrkiami ministeriuneq: Tyrkiami pisut nakkutigineqarput

- Naalagaaffimmi sulisut, qorsunnik pasillit, soorlu ilinniartitsisut allallu, aneqqusaajunnaartut suaarutigineqarpoq. Kisianni uanga qallunaatut innuttaassuseqarama, soorlu maanngaanniit aninissara ajoqutissartaqanngitsoq, Piitaq Samuelsen oqarpoq.

Pissutsilli oqaluttuarineqartutut inneranni nammineq qanoq iliussanerluni danskit nunanut allanut tunngasunut ministereqarfik saaffiginiarpaa paasiniaaffigalugu.

Pisorli aalassassimaartitsigaluartoq aappariit tyrkiami toqqissisimapput.

- Ernumananngitsorujussuuvunga. Ajunngitsumik pineqarlungalu inuit imminnut ataqqeqatigiimmata ajunngitsumik misigisimavunga, Piitaq Samuelsen, 2015-imili tyrkiami najugaqartoq oqarpoq