Kalaaleq issittumi ingeniøri siulleq naammassivoq

juunip 24-at 2005 06:38

Kalaaleq 23-nik ukiulik Ujarak Rosing Petersen issittumi ingeniøritut ilinniagaqarnermini siullersaalluni ullumikkut naammassivoq. Ujarak Rosing Petersen-ip ingeniøritut ilinniarnini Danmarks Tekniske Universitetimi ingerlassimavaa, taassuma Sisimiuni Sanaartornermik Ilinniarfik ilaatigut suleqatigaa, kiisalu Lyngbymi Danmarks Tekniske Universitet suleqatigalugu.

Ujarak Rosing Petersen Maniitsormiuuvoq. Sisimiuni Arktisk Centerimi ukiup aappaa avillugu ilinniartooriarluni, Nuummi ingeniøritut Siunnersuisarfimmi Rambøll-imi ukiup affaa ilinniarnerminut atatillugu misiliivoq, ukiullu kingulliit marluk Lyngbymi Danmarks Tekniske Universitetimi atuarluni.

- GU-mi atuareerlunga ilinniarfissannik toqqaanialerama issittumi ingeniøritut ilinniartunngorsinnaanissamik neqeroorut takkuppoq, pitsaanerusinnaasimanngilarlu. Teknikkimut tunngasut Nunarpullu soqutigisarigakkit, sanaartornermut nunattalu siuarsarneqarnissaanut tunngasut ataatsikkut aallutissallugit toqqarsimavakka. Ujarak Rosing Petersen oqarpoq.

Ilinniarnerminik naammassisup erngup nukinga atorlugu Sisimiuni Tasersuup eqqaani nukissiorfissaq soraarummeerutigisimavaa.