Kalaaleq inuusuttoq atuakkiaminik saqqummersitseqqaalerpoq
Oqaluttualiornermik unammisitsineq "Allatta " soqutigineqarluarpoq, tamanna inuusuttunit ilinniagaqarfinnilu atorluarneqarpoq.
Oqaluttualiorluni unammisitsinermi Allatta-mi 2012-mi ajugaasup atuakkiani siulleq sapaatip akunnerani uani saqqummersissavaa, atuakkiaq taaguuteqarpoq "Homo Sapienne "
Oqaluttualiorluni unammisitsinermut Allattamut peqataaneq iluaqutitaqartoq Niviaq Korneliussenip qularutiginngilaa.
- Oqaluttualiat kalaallisut allanneqartut inuusuttut akornanni pisariaqartinneqartorujussuupput
Niviaq Korneliussen 24-nik ukioqartoq oqarpoq. Allattami peqataanermi kingorna atuakkanik saqqummersitsisarfimmik Milik Publisingimik isumaqatigiissuteqarpoq atuakkiaalu siulleq sapaatip akunnerani uani saqqummersinneqassaaq
- Atuakkiami Homo Sapienne - mi oqaluttuat assigiinngitsut tallimat imminnut ataqatigiittut allanneqarput, tassani inuusuttut assigiinngitsut tallimat oqaluttuarineqarput, taakkua Nuummi najugaqarput taakkualu inuunerat qanoq assigiinngitsiginerat oqaluttuarineqarpoq , Niviaq Korneliussen oqarpoq.
Oqaluttualiamik allalluni unammisitsinermut peqataaniartut 15 november tungaanut allataminnik nassitsisinnaapput.
Taamaattumik inuusuttut peqataanissaannik Niviaq Korneliussen kaammattuuteqarpoq tamanna atuakkiortunngornermut ammaassisinnaammat.
Unammisitsinermut peqataasussanut Niviaq siunnersuuteqarpoq.
- Pingaaruteqarpoq allattap atuartaqattaarnissaa aamma nipituumik atuarneqarsinnaavoq kiisalu nalunngisanut atuartinneqarsinnaavoq kingornalu siunnersortittoqarsinnaavoq minnerunngitsumillu allataq pillugu oqaloqatigiittoqarluni taavalu inuit allat isumaat tusariarlugit atuakkiap imarisaa pitsanngorsarneqarsinnaavoq, Niviaq Korneliussen oqarpoq.
Atuakkiaa siulleq ' Homo Sapienne' sisamanngorpat 30 oktober saqqummissaaq, atuakkap saqqummersinneqarneranut atatillugu ulloq taanna Katuami aamma saqqummersinneqassaaq.