Kalaaleq Folketingimut qinigassanngortittoq

Kalaaleq arnaq 31-inik ukiulik Nikoline Ziemer folketingimut qinigassanngortippoq, Danmarkimi partii Socialistisk Folkepartii tunuliaqutaralugu. Nikoline Ziemerip qinigassanngortinnini Damarkimi ukiuni 10-ni najugaqarsimanermik tunngaveqartippaa.

- Danmarkimi ukiuni 10-ni nunaqarpunga, tassanilu politikkikkut sorlaqarlunga. Tamaattumik Danmarkimi partiit ilaannik tunuliaqutaqarlunga qinigassanngortinnera pissusissamisoorneruvoq, Nikoline Ziemer radioaviisimut oqarpoq.

Aamma oqarpoq Valbymi SF-it immikoortortaqarfiata siulersuisuini ukiuni arfineq marlunngortuni ilaasortaasimalluni. Siornatigut kalaallimik danskit partiianik tunuliaqutaqarluni aamma qinigassanngortittoqarsimavoq. Nikoline Ziemerip qineqqusaarluni assingi Valbymi eqqanilu tupigusuallatsitsisarlutik nivingapput.

Nikoline Ziemer imaani uumasunut tunngasunik ilisimatusarsimasoq marlunnik qitornaqarpoq tyskimik ataatalinnik. Nikoline Ziemerip maanna suliffeqanngikkallartup arnaa kalaaliuvoq angutaalu qallunaajulluni.

Qineqqusaarummini kalalliussutsini ersersissimavaa, kalaallit Danmarkimiittut atugarisaannik samminninnermigut.