Kalaaleq erinniaminik Savalimmiuni tusarnaartitseqqaartoq
Nammineq erinniani pingasunik immikkoortortaqartoq, "Avannaaniit" Torshavnimi Nordens Husimi ippassaq siullerpaamik tusarnaartitsissutigaa. Tusarnaartitsinera nipilersornikkut pikialaartitsinerup Summartonarip ilagaa.
Nipilersugassiaa kalaallit qilaatersoriaasianik aallaaveqarluni erinniarsuaavoq. Siullerpaamik tusarnaartitsissutigineqartup saniatigut aamma 'Qilaat i F-dur' aamma 'Kulusuk for solo fløjte' tusanaartitsinerup kalaalerpaluttunik immikkoortuani tusarnaartitsissutigineqarput. Arnannguaq Gjerstrøm tværfløjte qilaallu nipilersuutigai aammalu erinarsorluni.
Savalimmiormiut pikialaartitsinerannik aaqqissuisup oqaatigaa Kalaallit Nunaat nunat avannarliit killit ataatsimoorfiannut "europamiorpalunngitsumik" tunniussaqarsinnaasoq. Tamannalu pissutigalugu kalaallit nipilersortartut arlallit Summartonarimut peqataasinnaasimanerat nuannaarutigaa:
Qaanaarmiut qilaatersortartut Peter Qaavigaq aqutsisoralugu juulip qaammataani Savalimmiuniipput, aggustillu qaammataani Arnannguaq Gerstrøm tikeraartorineqarpoq.