Asii Berthelsen ukioq manna unammisaqattaarnerni maannamut aqqanileriarluni isertitsereerpoq.Assi: Privat

Kalaaleq Danmarkimi arnat U-18-it arsaanneranni isertitsinerpaasoq

Nunatsinneersoq 16-inik ukiulik isikkamik arsaannermik piginnaasaqarluartoq, Asii Berthelsen, Danmarkimi arnat U-18-it tassa 18-iliineqanngitsut isikkamik arsaallutik unammisaqattaarneranni isertitsinerpaavoq.

Fodboldforpiger.dk taama allaaserisaqarpoq.

Asii Berthelsen isikkamik arsaattartut klubbbianni Fortuna Hjørringimi arsaattartuuvoq, klubbilu taanna Danmarkimi arnat U-18-it isikkamik arsaattartuisa unammisaqattaarneranni qulingiluariarluni unammereerluni pointinik 24-nik angusaqarsimasoq siuttuuvoq.

Vildetikkullu sapaatiummat unammipput, siukkaatullu sisamariarluni isertitsinera unamminnermi tassani 5-0-mik ajugaanerannut peqqutaaqataalluinnarpoq.

Sapaatiummat unamminerminni isertissimasai ilanngullugit naatsorsoraanni ukioq manna unammisaqattaanerminni maannamut aqqanileriarluni isertitsereersimanini pissutigalugu unammisaqattaarnerni isertitsinerpaatut inissisimagallarpoq. Isertitsinerpaatut tullersortaa arfineq-pingasoriarluni isertitsisimavoq.

AAMMA ATUARUK Nuannaaqaanga tulluusimaarnaqaarlu

Danmarkimi arnat U-18-it isikkamik arsaattartut Danmarkimi arnat isikkamik arsaattartuinik nuna tamakkerlugu unammisitsisaqattaarnerni peqataasarput.

Isikkamik arsaattartutut siukkaq nunatsinneersoq, Asii Berthelsen, kalaallini siullersaalluni Danmarkimi arnat isikkamik arsaallutik nunanut allanut unammisartuinik katersuutsitsinermi peqataasussatut toqqagaavoq. Danmarkimi arnat isikkamik arsaallutik unammisartuinik U-16-inik ukioq manna aggustip qaammataani katersuutsitsinermi peqataasussatut toqqarneqarmat tamanna pivoq, taamanikkullu sungisaasuminit nersualaarneqarpoq:

- Piginnaasaqarpoq, taamaattumik peqataanissaanut periarfississallugu naleqqussimavoq. Siullermik timikkut nukittuvoq. Aamma sakkortuumik ungasissorujussuarmullu isimmitsillaqqissuuvoq. Isertitsinissilu tamaviaarutigisarpaa, Danmarkimi arnat U-16-it isikkamik arsaallutik nunanut allanut unammisartuisa sungiusaasuat Frank Johnsen siukkaq nunatsinneersoq pillugu TV2 SPORT-imut aggustimi oqarpoq. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat