Kalaaleq cykelertartoq Danmarki kaajallallugu sukkaniuteqataalerpoq

Frankrig kaajallallugu nunaannakkut qaqqanilu aqqusinertigut cykelernersuaq Tour de France ulluni makkunani pisoq kikkorpassuarnit malinnaaffigineqartarpoq. Imaassinnaavoq kalaallinit malinnaaffigineqarnerulersoq, tassami kalaaleq cykelertartoq Danmarkimi cykelimik sukkaniunnissarsuarmut ilaasussanngorpoq.
Allattoq Najaaraq Egede
juulip 10-at 2009 07:38

Post Danmark Rundt, cykelerluni Danmarkimik kaajallaaneq juulip ulluisa 29-anni aallartittussaq aggustip aappaa ilanngullugu ingerlanneqassaaq.

Kalaaleq cykelertartoq holdinut Glud & Marstrandikkunnut ilaasussaq tassaavoq 20-nik ukiulik Ricky Enø Jørgensen, AG taama allaaserinnippoq.

Ricky Enø Jørgensenip holdeqatigissavai allat arfineq-marluk.

Post Danmark Rundtimi holdit allat peqataatitaqartussat tassaapput, Team Saxo Bank - Bjarne Riis-ip siulersugai, Tour De Francernermi maanna angusarissaaqisut.

Post Danmark Rundt DR-TV-kkut aallakaatinneqartoq Kalaallit Nunaata Radioata TV-agut aamma juulip ulluisa 29-aniit takuneqarsinnaajumaarpoq.