Kalaaleq Canadamilu akileraaruserisut isumaqatigiissuteqarput

Kalaaleq Jonas Faber Canadami akileraartarnermut oqartussanut ammip qalipaataa tunngavigalugu immikkoortitsineq pillugu, ukiuni arfineq marlunni aaqqiagiinngissuteqarpoq.

Pineqartoq soqutigineqaqaaq, tassami Canadami inuit pisinnaatitaaffii pillugit eqqartuussivik aalajangersimammat, naggueqatigiinnut Inunnut ilaasumut oqaaserineqartut, ammip qalipaataanik immikkoortitsinermik taaneqarsinnaasut pillugit suliassaq ingerlakkumallugu. Taamaattorli eqqartuussinerup aallartinnissaanut ullut arlaqarunnaartullu Jonas Faber aamma Canadami akileraartarnermut oqartussat isumaqatigiissuteqarput. Naak isumaqatigiissuteqaraluarlutik, suliassaq nunap inoqqaavinut ajugaanerunerarpaa.

- Isumaqatigiissuteqarnera oqiliallaatigeqaara, tassami ukiuni arfineq marlunni tamanna ilungersuutigereerakku.

Jonas Faber Canadamit taama oqarpoq. Pineqartoq ukiut arfineq marluk matuma siornagut aallartippoq, taamanikkut Canadami akileraartarnermut oqartussat ammip qalipaataanik immikkoortitsinertut taaneqarsinnaasumik oqaaseqarsimammata. Akileraartarnermut oqartussat ilaatigut ima allapput: "Jonas Faber nunap inoqqaavisa ilagaat, uagutsitut qaqortumik amilittut akileraartarnissap pingaaruteqassusianik paasinnissinnaanngitsoq! Amerikami Qiterlermiusulli pissuseqarpoq, suna tamaat aqagumut utaqqitissinnaavaa".

Taamatut oqaatigineqarnini Jonas Faberip akuerisinnaanngilaa aamma tamatuma kinguninnguagut inuit pisinnaatitaaffii pillugit ataatsimiititaliamit taperserneqarpoq, oqartoqarluni oqaaserineqartut ammip qalipaataanik immikkoortitsinerusut, tamakkulu qaavisigut Canadami inuit pisinnaatitaaffii pillugit eqqartuussiviup suliassaq ingerlanniarlugu neriorsuutigaa. Suliassamut naggueqatigiinnut Inunnut ilaasumut atatillugu aatsaat taama pisoqarpoq.

Eqqartuussivitsigut suliarineqarnera ukiormanna septembarip arfineq-pingajuanni aallartittussaagaluarpoq, tamannali sioqqutilaarlugu Jonas Faber, eqqartuussissuserisuminit siunnersorneqarnermi kingornagut, akileraartarnermut oqartussanut isumaqatigiissuteqarpoq. Kisianni sooruna eqqartuussineq aallartilersorlu taamaaliortoq?

- Eqqartuussissuserisuma siunnersuutaat maliinnarpakka, naluaralu eqqortuliornerlunga kukkunerlungaluunniit. Taamaattorli pineqartoq manna ukiuni arfineq marlunni ilungersuutigereerpara, misigisimavungalu ukiut kingulliit arfineq- marluk eqqartuussivimmiissimallunga. Eqqumiitsuliortuunera inuuneralu ingerlateqqikkusukkakkit, Jonas Faber oqarpoq.

Jonas Faberip nuannaarutiginerpaavaa, taamatut ilungersuuteqarnermigut, suliassanut assingusunut nunap inoqqaavinut tunngasunut aqqutissiuusseqataagami.

- Canadami indianerit qullersaata inuit pisinnaatitaaffii pillugit eqqartuussivik aqqutigalugu, Canadami oqartussat nunap inoqqaavisa meerartaannik atuarfinnut najugaqarfiutigisunut 1920-miit 1980-imut pinngitsaaliilluni inissiisarsimanerat, ammip qalipaataanik immikkoortitsisumik eqqunngitsuliornerusoq maanna qulaajartinniarpaa, tamannalu ajugaaneruvoq. Ilungersuuteqarnini tamanna pisimasuuvoq pingaarnerpaaq, Jonas Faber erseqqissaavoq.

Jonas Faber aningaasanik taarsiivigineqassaaq, taamaattorli qanoq amerlatigisunik taarsiivigineqassanersoq isertuussaavoq.

Jonas Faber eqqumiitsuliortuuvoq ukiunilu kingullerni 35-ni Canadami najugaqarluni.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat