Kalaaleq Canadami nersornaatisivoq

Taanna 21-nik ukioqarluni katikkiartorluni Iqalunnut pivoq, taamanimiillu Iqalunni najugaqalerluni. Aaju Peter taamanikkut kalaallisut qallunaatullu taamaallaat oqalussinnaavoq, ukiualunnguilli ingerlanerini tuluit oqaasii aamma Inuktitut ilinniarpai, tamatumalu saniatigut Akilinermiut amminik mersortarnerannik ilinniarluni.

Eqqartuussissuserisutut soraarummeersimavoq, aamma  puisit amiinik atisalianik nutaalianik, ukiunik hunnorujulikkaanik pisoqaassusilinnik allalersukkanik tuniniaaffigisaminik pisiniarfiuteqarluni.

Taanna EU-p puisit amiinik eqqussinissamut inerteqquteqalerneranut akerliuniarluni suliniuteqartutut ilisimaneqarpoq, akerliuniarnerminullu atatillugu arlaleriarluni Europamiittarluni. Taamatullu suliniuteqarnera pissutigalugu Canadap naalagaaffiata nersornaaserniarpaa.

Taama suliniuteqarnerminut atatillugu 2012-imi Danmarkiliarlunilu Sverigiliarniarpoq taakkunannga ikiorserneqarsinnaanissani anguniarlugu. Aaju Peter aviisimut Globe and Mail-imut oqarpoq, puisit amiinik inerteqquteqarnermut akerliuniarnini, inerteqquteqarnerup  aningaasarsiornikkut kingunerisassaanut taamaallaat tunngassuteqanngitsoq, aammattaarli inerteqquteqarnerup naggueqatigiit Inuit oqaasiinut kulturiannullu sunniutai pillugit akerliuffigigini.

Matumani naggueqatigiit Inuit utoqqartaat kisiisa eqqarsaatiginagit, aammattaarli inuusuttut piniartutut inussutissarsiornerminnik tulluusimaarutiginnissinnaajunnaartussat pillugit akerliulluni, Aaju Peter oqarpoq.

Aaju Peter nersornaammik pingaarutilimmik taassuminnga general-guvernørimit upernaaru nersornaatisissaaq.