Kalaaleq Boliviamiorlu filmilioqatigiilersut
Apeqqutit taakku marluk filmiliortartut inuusuttut marluk Boliviamiup Alvaro Nunezip aamma kalaallip Ujarneq Fleischerip imminnut apeqqutigisussaavaat, aqagumiit septembarip 13-iata tungaanut pisimasuiit oqaluttuartalerlugit, inuiannik nunarsuup illuatungaanniit illuatungaannut ungasissusilimmik nunallit pillugit filmiliorlutik aallartikkunik.
Dansk Center for Kultur udveksling aamma Danmarkip Boliviami aallartitaqarfia La Pazimiittoq filmiliornissamut pingaarnertut aningaasaliisuupput. Tamannalu Kalaallit Nunaata Boliviallu kulturikkut paarlaateqatigiinnerannut sepetembarimi Sisimiuni Nuummilu ingerlanneqartussanut ilaavoq.
Filmiliornikkut silap pissusaata allanngoriartornerata nunap inoqqaavisa inuussutissarsiutitoqaannut sunniutai samminiarneqarput. Tassaasut Boliviami naasorissaasunut nunami qatsissorsuarmiunut panernersuaqarnera, aamma silap kiatsikkiartornerata sikuerukkiartorneratalu Nunatsinni piniartunut aalisartunullu sunniutai.
Pissusiviusut aallaavigineqartussaagaluartut taamaattoq nunat inoqqaavisa oqaluppalaavi ileqqutoqqanillu kingornussat filmiliornerni ilaatinniarneqarput, matumani nunat inoqqaavisa pinngortitamut uumasuinullu mianerinnillutillu ataqqinnittuunerat pineqarput.
Filmi minutsinik 15-inik sivisussuseqartussaq, decembarimi Københavnimi silap pissusaa pillugu ataatsimeersuartoqalerpat takutinneqassaaq.
Alvaro Nunez Boliviamiuuvoq pisimasuiit tunngavigalugit naatsunnguanik filmiliortartoq. Filmilioqataa kalaaleq Ujarneq Fleischer maani ilisimaneqalerpoq, filmiliani nuannarineqaqisoq "Tikeq, Qiterleq, Mikileraq, Eqeqqoq" ukiarmi Nuummi Sisimiunilu takutikkamiuk.
