Kalaaleq arnaq ujarassiooq siulleq naammassivoq
Morsimi nunap qaleriissaarnerani Furformationemik taaneqartartumi innermik anitsisumit arsakut qaleriissaarneri, Majken Djurhuus Poulsenip soraarummiissutigai, nersorneqaatigalugulu.
- Ilimagisimanngikkaluarpara, kalaallilli arnartaanni ujarassiuutut naammassisuni siullersaajunera tulluusimaarutigeqaara. Ilaquttakka Nanortalimmiittut aamma eqqarsaatinniipput. Anaanaga ataatagalu allalu eqqarsaatinniipput, Majken Djurhuus Poulsen nuannaaqisoq oqarpoq.
Naallu Nunatsinni aatsitassat pillugit Nunatsinni Danmarkimilu oqallittoqangaatsiaraluartoq, oqallinnermut akuujumanngilaq:
- Politikeriunngilanga, ujarassiuutulli naammassinikuullunga. Ujaqqalli misissorusunneruakka nassuiarlugillu. Pissutsit assigiinngitsut paatsuunganarsinnaasut isummallu pigiliutiinnakkat sunniuteqarfigineqarsinnaanissaat aamma neriuutigaara. Inuimmi ilisimasaqarfiginngisatik immaqa pissutigalugit ilaatigut isornartorsiuisarput, Majken Djurhuus Poulsen oqarpoq.
Danmarkimi ukiuni kingullerni qulingiluani ilinniarsimalluni Nunatsinnut uteqqinnissaminut Majken Djurhuus Poulsen qilanaarpoq:
- Kalaallit Nunaat maqaasinikooqaara, angerlarnissaralu assut qilaanaaraara, kalaaleq arnaq ujarassiuutut naammasseqqammersoq Majken Djurhuus Poulsen oqarpoq.
Danmarkimi ilinniarnissamut atatillugu qinnuteqarniaraanni www.optagelse.dk -mut iserluni paasiniaasoqarsinnaavoq.
Ilinniarnissamut qinnuteqarniartut kvote 2-mik taaneqartartumiittunut qinnuteqarnissamut ulloq killigititaq tassaavoq marsip 15-iat, kvote 1-imilu taaneqartartumiittut juulip ulluisa tallimaanni kingusinnerpaamik qinnuteqartussaallutik.
Naalagaaffiup ilinniartunut tapiissutaannut atatillugu immikkut ittumik tapiissuteqarnissamut qinnuteqarniaraanni ulloq killigititaq tassaavoq marip aallaqqaataat. Immikku ittumik tapiiffigineqarnissamut qinnuteqaat Danmarkimi Kalaallit Illuutaannut nassiunneqartussaavoq.
