Kalaaleq arnaq toqutsisutut pasisaasoq
Danskeq 63-nik ukiulik, Eddy Niels Frederiksen, savimmik tunumigut kapineqareerluni apriilip 29-ani toquvoq. Taanna ikilerujussuarneqarsimalluni niuertarfimmut qanittuminniittumut apuuteqqarpoq, niuertarfimmiillu ambulancenik noqqaasoqarpoq. Uummammigulli kapineqarsimagami 63-k ukiulik annaanneqanngitsoorpoq.
Arnaq inatsit tunngaviusoq naapertorlugu killisiuisoqarami kapisisuunnginnerarpoq, Københavnilli kitaani politiit naapertorlugit eqqaamasaqarsimanngilaq. Eddy Niels Frederiksen-ip meeqqani marluk ernuttanilu ataaseq qimatarai.
Pinerlunnerni ilungersunartuni, Danmarkimi qaammatialuinnguit ingerlanerinnaani pisuni, pasineqartut kalaallinit kingoqqqisut sisamaapput.
Perorsaasoq 46-nik ukiulik Judy Meinche Viborgip eqqaani Dollerup Bakkini savimmik kapineqarluni februaarimi toqunneqarpoq.
Unnerluussaasoq najugaqarfimmi toqutaasup suliffigisaani najugaqartuuvoq. Taassuma arnaa misiligummik taallugu meeqqanut Danmarkimut 1950-ikkunni pinngitsaalillugit aallartinneqartunut ilaavoq.
52-inik ukiulik Karen Olsvig qaratsamigut aanaartoorluni Koldingimi toqusimasoq qaammat qaangiummat nassaarineqarpoq. Niaqqumigut ippassaammat unnukkuanni anaaneqarsimavoq, inooqataalu kalaaleq toqumik kinguneqartumik persuttaasimasutut maanna pasisaavoq.
Kalaaleq 45-nik ukiulik Severine Møller savimmik kapineqarluni Odensemi tussiarfissuami toqunneqarpoq. Inooqataa 31-nik ukiulik aamma kalaaleq toqutsisutut pasisaavoq.
Folketingimut ilaasortaq IA-meersoq, Sara Olsvig, aviisimi B.T.-mi ippassaq eqeersaavoq. Taassuma kalaallit Danmarkimiittut katataanissamut ulorianartorsiortut iliuuseqarfiginissaat ujartorpaa.
- Pinaveersaartitsiniarluni sulianik pisariaqartinneqaraluartunik naammassineqanngitsoqarpoq. Isumaginninnikkut immikkut suliniuteqartoqanngimmat katataqarnissaq qaninneruvoq, Sara Olsvig B.T.-mut oqarpoq.
Kalaallinut Danmarkimi najugaqartunut katataanissamut ulorianartorsiortunut danskit naalakkersuisui iliuusissatut Naalagaaffik pilersaarusiussasoq, isumaginninnermut ministeri Karen Hækkerup neriorsuuteqareerpoq.
