Kalaaleq arnaq iggarissoq qallunaaqqanut ooqattaarisitsilersoq

Kalaaleq arnaq iggarissoq, Ane Sofie Hardenberg, kalaaliminernik qallunaaqqanut ooqattaarisitsisussanngorpoq.

Københavnip ilaani Frederiksbergimi atuartut klasset arfineq’pingasut septemberip pingasunngornerani kingullermi nerisassanik Europap avannaamiuisa nerisassaataannik ooqattaarisinneqaqattaassapput, ooqattaagassallu ilagissavaat nunatsinnit puisip orsua, paarnat, kuannit aamma kimmernat, igasoralugu arnaq kalaaleq kalaaliminernik iggarissoq, Ane Sofie Hardenberg.

Igasoq danskiusoq, nerisassiullammak, Claus Meyer, aamma peqataassaaq.

Avannaamiut nerisassaataasa ilisaritilluarniarneranni ilaatigut Danmarkimi Aallaaniat Kattuffiat nerisassaqartitsissaaq avannaamiut neqaataat, aalisagaataat naatitaallu salliutinneqassallutik.

Igasut nerisassanillu soqutiginnilluartut igasuullutillu ilisaritsisuussapput.

Ooqattaarisaqattaarnermi sammisassat ukuupput: “Immuk tunngavigalugu” “Tarajornitsoq, pujuugaq tarajortigarlu” taavalu “Naatsiiaq kissartoq”.