Kalaaleq arnaq angummik 61-inik ukiulimmik Københavnimi toqutsisimasutut pasineqartoq

Arnaq kalaaleq, 27-nik ukiulik angummik, 61-inik ukiulimmik Solrød Strandimi sapaammi nassaarineqartumik toqutsisimasutut pasineqarpoq. Midt- og Vestsjællands Politiit taama paasissutissiipput.

Arnaq Roskildep eqqartuussiviani inatsit tunngaviusoq naapertorlugu ataasinngornermi nalunaaqutaq 13.45 killisiorneqarpoq.

Angutip toqusup ikinngutaata najukkamut ornigulluni arlaannik ajortoqarneranik paasisaqarnerata kingunerisaanik politiit sapaammi ualikkut nalunaaqutaq 16.39 ornigupput. Midt- og Vestsjællands Politiini pisortap tullersortaa, Bjørke Kierkegaard oqarpoq.

- Inuk toqungagunartoq pillugu nalunaarfigineqarpugut, angut toqoreersimasoq apuuppugut, Bjørke Kierkegaard oqarpoq.

Politiit najukkamut apuukkamik angut 61-inik ukiulik nassaaraat, arnarlu 27-nik ukiulik aamma naapillugu. Taanna pisumut atatillugu tigusarineqarpoq.

Nakuuserfigineqarsimagunartoq

Politiit ornigumminnerminni angut nakuuserfigineqarsimagunartoq paasivaat, Bjørke Kierkegaard paasissutissiivoq.

Angutip qanga qanorlu toqusimanera pillugu aalajangersaanissamut toqungasumik misissuisoqarnisaa amigaataavoq.

- Nakorsat pinerlussimanermik misissuisartut pinerluuteqarfiusumi suli misissuinerat pissutigalugu annerusumik paasissutissiisinnaanngilagut, Bjørke Kierkegaard oqarpoq.

Arnaq 27-nik ukiulik angullu 61-inik ukiulik imminnut attuumassuteqarput, qanorpiarli attuumassuteqarnersut politiit suli paasissutissiissutigisinnaanngilaat.

Toqutsinermut pissutaasoq suli ilisimaneqanngilaq.

Arnaq toqutsisuunnginnerarpoq.