Kalaaleq angerlarsimaffeqanngitsoq takornariartitsisuuvoq
Suliniut taaguuteqartinneqarpoq 'Aqquserngup nipaat', tassani Københavnimi angerlarsimaffeqanngitsut illoqarfitsik København ilisaritippaat. Kalaallip angerlarsimaffeqanngitsup umiartortuusimasullu Frederik Olsenip Københavnip ikerasaliaanni angallassineq suliaraa.
- Aasami maani sinngup puuani silami sinilluni ajunngilaq. Tamaani sinittut politiinit peersitaaneq ajorput aamma issiaarfinni issialluta immiaaqqanik imeraluaruttaluunniit peersitaaneq ajorpugut. Tamaani aamma puiaasanik katersugassaqaqaaq. Sulinngiffeqaraagama maani Københavnimi nuannisaaginnavittarpunga. Ukiuni 20-ni umiartortutut sulininni sorlaqanngitsuusatut inuuvunga. Maanna maani illoqarfimmi najukkanni inuiaqatigiit akornanni naleqqussarlunga inuuvunga. Uniffeqarpiarnaga inuuvunga aamma Kalaallit Nunaanniikkallarama taamaappunga, Frederik Olsen oqarpoq.
Royal Arctic Linep nunaqarfinnut pajuttaataani aamma qallunaat umiarsuaanni nunanut allanukartartuni Frederik Olsen umiartortuusimavoq. Nunarsuatsinni aningaasarliornerup kingunerisaanik umiarsuarni inuttanngorniarneq ajornarnerulersimasoq oqaluttuaraa. Københavnillu ikerasaliaanni takornariartitsisutut suligallarnini nuannaarutigalugu.
- Angerlarsimaffeqanngitsut pillugit isummat inuiaqatigiinnit pigiliussat allanngortinniarnissaat siunertarivarput. Inuit angerlarsimaffeqanngitsunik ersigisaqartut amerlavallaarput aamma isumaqakkajuttarput angerlarsimaffeqanngitsut pinerlunniartartuusut. Taamaattuunngilagulli. Inuinnaavugut nalinginnaasut, aamma qungujunneqartarnerput nuannaarutigisarparput, Frederik Olsen oqarpoq.
Københavnip ikerasaliaanni sulisuuneq aamma illuatungeqarpoq, tassami kommunemit ikiuutisiat ikilineqarsimammata. Tamannali ajoriinnagassaanngilaq Frederik Olsen oqarpoq, nangillunilu:
- Kommunep ikiuutigitittagaanik pisarnera maani suliniutip atorunnaarsigajavippaa, tassami nammineerlunga akissarsiorama. Ikiuutisiaarunnerma ajunngequtigaa imminut tatiginerulernera, tassami ikiorneqarnissannut utaqqiinnarunnaarama, Frederik Olsen oqarpoq.
Frederik Olsen juulimi augustillu sisamaani aammaarluni marloriarluni ikerasaliani angallassissaaq. Suliniut taaguuteqartinneqarpoq Poverty Walks/ Aqquserngup nipaat, taannalu imminut ingerlattumit Projekt Udenfor-imit ingerlanneqarpoq. Takornariartitsinerni isertitat tamarluinnaasa angerlarsimaffeqanngitsumut takornariartitsisumut tunniunneqartarput.
