Kalaaleq 15-inik ukiulik toqutsisimasutut pinngitsaaliisimasutullu tigusarineqarpoq

Jyllandip avannaani politiit Kalaallit Nunaannilu politiit suleqatigiinnerisigut, nukappiaraq kalaaleq, 15-inik ukiulik, 85-inik ukiulimmik Gerda Møllerimik toqutsisimasutut pasillugu tigusaraat. Jyllandip avannaani vicepoliti-inspektør, Frank Olsen, tusagassiuutitigut taama nalunaaruteqarpoq.
septembarip 14-at 2007 06:24

Nukappiaraq Gerda Møllerimik toqutsisimasutut pinngitsaaliisimasutullu nassuerpoq. Toqutsineq Aalborgimi maajip ulluisa 26-anni karnevalertoqarnerani pivoq. Nukappiaqqap inuaasa nuuisa ipaai pinerluffimmi siusinnerusukkut aamma nassaarineqarput.

Nukappiaqqap kamippai Adidasit immikkuullarissunik alullit inikui aamma nassaarineqarput, kamippaat taamaattut 1000-it Danmarkimi tunisaasimapput. Kamippannillu taamaattunik pisisimasut misissuiviginerisigut nukappiaraq nassaarineqarpoq.

- Pisiniarfik Bilka, Skalborg-imiittoq, Adidasinik taakkuninnga 57-inik upernassaq tunisaqarpoq, taakkulu pisisimasut ujarpavut, Frank Olsen, Jyllandip avannaani politiiusoq oqarpoq.

Nukappiaraq Qaqortup Eqqartuussiviani inatsit tunngaviusoq naapertorlugu ippassaq killisiorneqarpoq, sapaatip akunnerinilu sisamani tigummigallagassanngortinneqarpoq. Nukappiaqqap nassuiaataanik Frank Olsen paasissutissiinngilaq, killisiuneq matoqqasumik inatsit tunngaviusoq naapertorlugu ingerlanneqarmat.

Gerda Møller savimmik timimigut kapoortilluni niaqqumigullu sakkortuumik annersarneqarluni toqutaavoq.

“Inuunngitsutut pissusilersorluni toqutsineq” Aalborgimi politiit toqutsineq taama taavaat, toqutsinerlu innuttaasunit tupassutigeqaat.

Nukappiaraq Aalborgimi paarnaarussivimmut ungasinngitsukkut nuutsinneqassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq