Plastikkit ataasiaannarlugit atorneqarsinnaasut EU-mi inerteqqutigineqalissapput
Eqqakkat plastikkiusut Europami sinerissamut nunarsuullu sinnerani imartanut pisartut, sapinngisamik ikinnerpaaffimminniitsinneqarnissaat pillugu eqqakkat plastikkiusut pillugit EU-mi malitassat nutaat siunertaraat.
SF sinnerlugu Europa-parlamentimut ilaasortap Margrethe Aukenip malittassat nutaat nuannaarutigai, eqqakkammi plastikkiusut ikilisarneqarnissaat taassuma sukataarutigisimavaa:
- Nioqqutissat plastikkit ataasiaannarlugit atorneqartussatut naatsorsuussat atorneqarnerujussuat eqqumaffigineqarnerulernera nuannaarutigaara, kiisami iliuuseqartoqalerpoq. Taamaammat tamanna pillugu isumaqatigiissusiorsinnaasimagatta nuannaarutigaara, Margrethe Auken oqarpoq.
Cigaretsit kimmiviinik, immiartorfinnik puussianillu plastikkiusunik tunisassiortut tunisassiatik atorneqareeraangata katersorneqartarnissaannut akisussaassuseqarnerulertariaqarput, eqqakkallu torersumik passunneqarnissaat isumagisariaqarlugu. Plastikkit pillugit EU-mi malitassat nutaat taama piumasaqaatitaqarput.
Isumaqatigiissutip nutaap aappaagu upernaakkut pisortatigoortumik akuersissutigineqarnissaa naatsorsuutigineqarpoq.
Nunarpulli EU-mut ilaasortaanngimmat piumasaqaatit nutaat nunatsinnut atuuttussaatinneqanngillat.
