Angutit nunanut alllanut unammisartui Elite Sport Greenlandimit aningaasaliiffigineqarput, arnalli aningaasaliiffigineqarnikuunngimmata futsalimi nunanut allanut unammisartoqanngillat. Assi: Malik Brøns, KNR

KAK-p isornartorsiut ilisarisinnaavaa: Arnat ukkatarineqannginnerusut

Arnat angutillu isikkamik arsaattartuinik assigiinngisitsineq Kalaallit Arsaattartut Kattuaffiata ilisarisinnaavaa. Kattuffiup angutit arsaattartuinik aallussinerunera aningaasaliisoqarnerannik peqquteqartoq, kattuffiup siulittaasuata erseqqissaatigaa.

Arnat isikkamik arsaattartuisa unammisarnerat angutit arsaattartuisa unammisarnerannut sanilliullugit tusagassiorfinnit malinnaaffigineqannginnerupput.

Taassuma saniatigut futsalimi nunanut allanut sungiusaasoqanngillat.

Tamakku ilaatigut peqqutaallutik arnat unammeqataanissaminnut piumassusikinnerulertartut, arnat isikkamik arsaattartut KNR-ip oqaloqatigisimasai oqaatigereerpaat.

Kalaallit Arsaattartut Kattuaffiata siulittaasua ajornartorsiut ilisarisinnaalluarpaa.

AAMMA ATUARUK Arsaattartunit pikkorissunit kajumissaarut: Arnat arsaattarnerat ima malunnarsiseqqinneqarsinnaavoq

Angutit futsalimi nunanut allanut unammisartui Elite Sport Greenlandimit aningaasaliiffigineqarput, arnalli aningaasaliiffigineqarnikuunngimmata futsalimi nunanut allanut unammisartoqanngillat.

- Taamaattumik angutit ukkatarisinnaasarpagut, taakku aningaasaliissutit toqqammavigalugit. Taakku pisimanngitsuugutsigit assigeeqqissaamik inissisimassagaluarput, KAK-mi siulittaasoq John Thorsen oqarpoq.

Arnanut aningaasaliinngitsut

Arnat isikkamik arsaattartut iligiit qulingiluaasuni sisamaannaat Nuummi sapaatip akunnera kingulleq unammersuaqataapput.

KAK-p arnanik angutinillu assigiinngisitsinini unitsittariaqaraa, arnanit ilaatigut isornartorsiutigineqarpoq.

Elite Sport Greenlandip angutit arsaattartuinut taamaallaat aningaasaliinini ilumoornerarpaa.

Kisiannili:

- KAK-minngaanniit aperineqarnikuungilagut arnat aningaasaliiffigisinnaanerigut, Elite Sport Greenlandimi siulersuisuni siulittaasoq Nikolaj Christoffersen oqarpoq.

AAMMA ATUARUK KAK arnat arsaattarnerat pillugu: Peqatigiiffiit arlallit peqataannginnissamik nalunaarnerat ajuusaarnarpoq

Elite Sport Greenlandilu aningaasaliissappat piumasaqaatit naammassineqaqqaartariaqarput. Tassa timersortartut pikkorivissuusariaqarput.

- Timersortartut pikkorivissut aningaasaliiffigisarpagut. Aningaasaliinnginnitsinnilu piginnaasaat qanoq innersut nalilersoqqaartarpagut, Nikolaj Christoffersen oqarpoq.

TV-kkut aallakaatinneqarpianngitsut

Arnat arsaattartut tusagassiuutitiguttaaq malinnaavigineqarnerat angutinut sanilliutissagaanni annikinneruvoq .

Arnat isikkamik arsaallutik pissartanngorniunnerini anngunniutivinnerit bronzennanniunnerallu KNR TV-kkut aallakaatinneqarput. Angutilli unammineri tamaasa toqqaannartumik aallakaatinneqarlutik.

Tamanna KNR-imit ima nassuiaaserneqarpoq.

- Aamma eqqarsaatigisariaqassagatsigu isiginnaartunut qanoq soqutiginartigissanersoq arsaattut annertulaartumik nikingappata. Pikkorissutsimikkut nikingangaatsiartut aallakaatikkutsigit holdip aappaa målerpassuarnik ajugaasoq aamma taanna apeqqusertariaqassagatsigu, KNR TV-mi aallakaatitassiornermik aqutsisoq Mathias Davidsen oqarpoq.

Arnat arsaattarnerat ineriartortinneqassasoq

Arnat angutillu illup iluani arsaannermi nunanut allanut unammisartui 2021-imi Island gamesertoqalerpat sungiusaasoqalernissaat kattuffiup neriorsuutigaa.

Taava aamma arnat isikkamik arsaattartut peqataanerunissaat ineriartortinneqarnissaalu anguniarlugit kattuffik maanna sulissuteqarpoq. Taassuma saniatigut peqataannginnissamik nalunaartut sooq taama amerlatigisimanerat qulaajarneqaleruttorpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat