KAK-mi siulittaasoq: Taamaattumik Rene Olsen futsalimi nuna tamakkerlugu sungiusaasunngoqqippoq
alaalli arsaattartut kattuffiata KAKp aamma Rene Olsenip piffissami sivitsortumi oqaloqatigiinnerat taama naammassisaqarfiuvoq.
Oqaloqatigiinnerlu aallartippoq Rene Olsen futsalimi nuna tamakkerlugu sungiusaasutut januarimi soraarsitaagaluarmat akerliusut oqaaseqartareersut.
AAMMA ATUARUK Arsaattartut Kattuffiata Rene Olsen nunanut allanut unammisartunut sungiusaasunngorteqqikkaa
Akerliunerit oqaloqatigiinnerillu aallarteqqinnissaannik kaammattuinerit KNR-mi nutaarsiassani radiomilu timersornermi tusarliunneqartartut KAK-mi siulersuisut tusaaniarsimavaat.
- Qisuariaatit tusaaniarpagut tamatumalu kingorna KAK-mi siulersuisut aalajangerput Rene Olsenimik oqaloqateqarnerit aallarteqqinneqassasut suleqatigiileqqinnissaq siunertaralugu, KAK-mi siulittaasoq Benjamin Kielsen KNR-mut oqarpoq.
AAMMA ATUARUK Nuummi arsaattartut peqatigiiffii nuna tamakkerlugu sungiusaasup soraarsitaanera pillugu: Atorfinitseqqinniarsiuk
Nunanut allanut unammisartuni anføreri Lars-Erik Reimer arsartut sinnerlugit oqaaseqarami takusaqarsinnaannginnerarpoq Rene Olsenitut sungiusaasutut piginnaasalimmik taartigisinnaasaanik.
Nordic Cup Nuummi
Peqatigiiffiit arsaannermi aallussisut Nuummi suleqatigiiffiat NBU aamma Rene Olsenimik oqaloqateqarnerit kaammattuivoq aallarteqqinnissaannut Nunatsinni arsaannermik aallussisut avissaartuutilernissaat aarleqqutigigamikku.
Tunngavilersuutillu tamakku naammapput KAK-mi siulersuisut kukkusimanermik nassuerutiginninnerannut.
- Nunani avannarlermiut futsalimi unammiuaartarnerisa Nordic Cupip 2023-mi aaqqissuunnissaata qinnutiginissaa sulissutigaarput tassungalu atatillugu avissartuunneq atorfissaqartinnagu illuanik suleqatigiittariaqarluta. Pissutsit tamakku nipilersoqataapput Rene Olsenimik suleqateqarnerup nanginnissaa pillugu oqaloqatigeeqqilernermut, Benjamin Kielsen oqarpoq.
- Aaqqissuisuunermi nukipparujussuit pisariaqartinneqartussaapput nunalu tamakkerlugu sungiusaasumik taarsiisoqassappat allamut ingerlalersoqarsinnaavoq, Benjamin Kielsen itisiliivoq.
AAMMA ATUARUK Sungiusaasumik soraarsitsisoqareernerani futsalertartut: KAK tassani uniorpoq
KAK-mi siulittaasoq KNR-miit aperaarput Rene Olsenimik suleqateqarnerup januarimi unitsinneqaraluarneranut atatillugu aalajangipallattoqarpallaarsimanersoq.
- Taamatut oqartoqarsinnaavoq. Kisianni aamma Nordic Cupimut atatillugu piumasaqaateqarnikuuvugut. Maannali pereersut uninngaffigiinnarnagit siunissamut isigerusunneruvugut pitsaanerusunillu angusaqartalernissaq sulissutigalugu, Benjamin Kielsen naggasiivoq.
