Kajumissutsimik sulisut aningaasaliiffigineqassanngillat
Aningaasaliisoqanngilaq, kisianni oqaasissat amigaataanngillat Inatsisartut ullumikkut apeqquteqaat tunngavigalugu, isumassuinermi aamma peqqinnissamut tunngatillugu kajumissutsiminnik suliaqartartunut aningaasatigut aaqqissuussinikkullu atugassarititaasut pitsaanerulernissaat oqallisigineqarmat.
Apeqquteqaateqartoq tassaavoq Asii Chemnitz Narup, IA-meersoq, taassumalu erseqqissarpaa, inuiaqatigiit kalaallit inuiaqatigiittut akisussaaneq pingaarnerutillugu kajumissutsiminnik suliaqartartunik pisariaqartitsisut.
Taassuma kissaatigaa piffissaq qaninnerusoq eqqarsaatigalugu siunertamut aningaasanut inatsimmi aalajangersimasunut aningaasaliisoqartariaqartoq. Piffissaq ungasinnerulaartoq isigalugu isumassuinermi aamma peqqinnissamut tunngatillugu kajumissutsiminnik suliaqartartunut qitiusumik ingerlatsivimmik pilersitsisoqartariaqartoq, periaatsinik ineriartortitsiviusussamik misilittakkanillu katersiviusussamik.
Eqqarsaatit saqqummiunneqartut partinit allanit taperserneqarput aamma naalakkersuisunit inatsisartunillu nunatsinni isumassuinikkut kajumissutsimik sulinerup pisariaqartinneqarnera taperserneqarpoq.
- Issittumi qangaaniilli ileqquuvoq, uumaannarsinnaajumalluni ikioqatigiittarneq. Kisianni nunatsinni ullutsinni ajornartorsiulernermi Namminersornerullutik Oqartussat imaluunniit kommunit pinngitsoorneqarsinnaajunnaarsimapput. Inuiaqatigiinni atugarissaarfiusuni suliassat isumagineqarnissaanni kajumissutsiminnik suliaqartut pingaarutilittut isigisariaqarpavut, Astrid Fleischer Rex Demokraatineersoq oqarpoq.
