Qulaarpaa Kajumissuseqannginneq ilinniarniarnermut ajoqutaavoq

Kajumissuseqannginneq unittarnerillu annertuneri naaffeqanngitsumik ajortitsisinnaavoq, akerlianilli aamma pisoqarsinnaavoq, siunnersuisoq oqarpoq.
Assi © : KNR
apriilip 28-at 2016 05:00

Ilinniarluni aallartinnermi unammillernartut amerlasinnaapput, pitsaasumillu ilinniarsinnaaneq iluatsitsilluarnermut iluatsinngitsoornermulluunniit isumaqarsinnaavoq.   

Taamaammat ilinniartut amerlasuut kajumissuseqannginnerat unittartullu amerlanerat unammillernartuuvoq, nuanninngitsumillu kinguneqarsinnaalluni. Uniinnartartut amerlanerat ilinniartoqatinut sunniuteqartarpoq:

- Aallarteqatigisaat naak. Immaqa ilinniartut pitsaasumik ilinniarsinnaanerannut sunniuteqartarpoq, Ilisimatusarfimmi rektori, Tine Pars oqarpoq. 

Aamma atuaruk Ilisimatusarfimmi qaffasissuseq qaffappoq

Ilinniartut imminnut ikioqatigiisinnaapput

2011-imi bachelorinngorniarlutik aallartittut 48 procentii unipput. Pingajorarterutai naammassipput sinnerilu suli naammassinatik. Ilinniakkat ilaanni ilinniartut 80 procentii sinnerlugit unittarput.

Agathe Adolfsen Ilisimatusarfimmi ilinniarneq pillugu ilitsersuisuuvoq piffissarujussuarlu ilinniartut oqaloqatiginerannut atortarlugu. Piginnaasat isiginiarneqarneri taamaallaat unammillernanngitsoq misigisarpaa, kajumissuserli aamma unammillernartartoq kinguneqartarlunilu. 

Aamma atuaruk  Immikkoortortami pisortap ilinniartut piginnaasakippallaarsorai

- Ilinniartunut allanut tamanna sunniuteqarsinnaavoq aammali qiimmannarsinnaalluni. Atuaqatigiinni ataatsimoorneq qanoq innersoq apeqqutaasorujussuuvoq, Agathe Adolfsen taama oqarpoq.

Nerisassiorneq imminullu piumaffigineq

Ilinniartut naapittagai assigiinngitsunik artorsaateqartarput. Amerlasuut illoqarfinni allaninngaanneersuusarput unammillernartorpassuarnillu aqqusaagaqartarlutik oqaatsinut akiligassanullu tunnganngitsunik.

Aamma atuaruk  Pitsaassutsimik qaffassaaniarneq inissaqartitsilluarnermut ajoqutaassaaq

Taamannak misigisuni annikitsunnguilluunniit iluaqutaasinnaasarput. Oqaloqatigiinnerlu sivikikkaluarluunniit iluaqutaasinnaasoq ilinniarneq pillugu ilitsersuisup arlaleriarluni misiginikuuaa.

- Kaammaattuutaasinnaasunik sakkusaanik tuniorarlugit pisarpavut, taavalu pisariaqartitsippata tarnip pissusaanik ilisimasalimmik oqaluusisinnaanissaannut innersuuttarpagut. 

Ilisimatusarfimmi tarnip pissusiinik ilisimasalimmik oqaloqateqarnissamik ullumikkut neqerooruteqartarpoq, ilinniartullu aamma ineriartortinnissamik siunnersuisoq oqaloqatigisinnaavaat. Amerlasuulli oqaloqateqarsinnaallutik Agathe Adolfsenip oqaloqatiginnginnerani ilisimasanngilaat.

- Paasigaangamikkulu ikiortissaqarlutik eqqissiallallutillu nuannaartarput, Agathe Adolfsen oqarpoq.