Kajumissaatinik agguaassisoqarpoq
Kajumissaatit 5.000-inik, 10.000-inik imaluunniit 20.000 koruuninik aningaasartaqartut innuttaasut peqqissuunissaannik suliniuteqartunut agguaanneqarput.
Katillugit inuit qulit peqatigiiffiillu kajumissaaserneqarput.
Nuummi angerlarsimaffeqanngitsunik kisimiittunillu juullisiortitsinissamik piumassutsiminnik suliniuteqartut 20.000 koruuninik tapiiffigineqarput. Soorluttaaq Nuummi angajoqqaarsiaasartut peqatigiiffiat aamma taamatut tapiiffigineqartoq.
Qaqortumi atuaqatigiit 5.a-t kigutiminnik paarsilluarnermikkut naammassisaaannut 5.000 koruuninik kajumissaaserneqarput. Atammimmi utoqqaat innarluutillillu peqatigiiffiat sapaatip akunneranut ataasiarluni timigissarnissamut timimillu aalatitsinissamut aamma assassorluni aaqqissuussisarnernut neqeroorutit eqqanaarneqarnissaannik suliniuteqarnerannut tapiiffigineqarput.
Katillugit inuit qulit peqatigiiffiillu kajumissaaserneqarput.
Qiimmassaatit makkununnga agguaanneqarput:
”Nuummi angerlarsimaffeqanngitsunik/kisimiittunillu juullisiortitsineq”-mik piumassutsiminnik suliniuteqartunut: Kr. 20.000.
Pilersitsineq 2006-mi aallartinneqarpoq ukioq mannalu ingerlanneqaqqissalluni, tamanna Nuummi angerlarsimaffeqanngitsunit kisimiittunillu nuannaarutigineqarluarpoq.
Nuummi angajoqqaarsiaasartut peqatigiiffiat: Kr. 20.000.
Meeqqanik inuusuttunillu sumiginnagaasunik annertuumik sullissinerannut aammalu ajornartorsiutip ersersinneqarnissaanut suliniuteqarnerannut.
Nuummi inuusuttut Siuarsartut (NUIF): Kr. 10.000.
Sammisaqartitsinerpassuinut, taakkunani inuusuttut nammineerlutik inuusuttoqatiminnik sammisaqartitsinernik aaqqissuussisarput. Taamaaliornikkut inuusuttut allat sammisanut allaanerusunut, ilaatigut pinaveersaartitsinermik toraagalinnut inuttullu ineriartorfissamut periarfissalinnut ornigukkusulersittarpaat
Nuummi kigutigissaasut peqatigiiffiat KIGUT: Kr. 10.000.
Kalaallit kigutigissaanermut ullorititaata ingerlanneqarnerani tunniusimallutik peqataanerannut, tassani sualummik meeqqat peqqissunik kiguteqarnissaat qitiutinneqarpoq.
Peter Christiansen, Nuuk: Kr. 5.000,00.
Piitap ukiuni arlalinni pualavallaarnerminut akiuussimanini aqqutigalugu inooriaatsini allanngortissinnaasimavaa. Ajornartorsiutit takusinnaasimavai ikiortissarsiorsimallunilu. Allanut siunnersuutaa pitsaasoq tassaavoq: ”piffissaagallartillu ikiortissannik ujartuigit”
Kullorsuarmi isiginnaartitsartut ”Pillegijaaq 99”: Kr. 5.000,00
Pilligijaaq nunaqarfimmi piumassutsimik peqataasunit atorneqartarpoq. Isiginnaartitsisartut isiginnaartitsigaangamik imminortarneq pillugu suliaqartarput aammalu ”Inuuneq pitsaasoq” sammisarlugu. Tamatuma saniatigut nunaqarfimmi unnussiuaartitsisarput, taakkulu ingerlanneqarsinnaanissaannut namminneq aningaasanik katersisarlutik, pisortatigoortumik taperneqarnatik.
Julie aamma Josef Løvstrøm, Qasigiannguit: Kr. 5.000,00
Aappariit ukiorpassuarni nammineq piummassusertik naapertorlugu Qasigiannguani meeqqanik inuusuttunillu sammisaqartitsisarnermik pilersitsisarput. Ilaatigut aamma Nuummi Katuami takutinneqarnikuusumik isiginnaarsitsinermik oqallisissiamik.
Atammimmi utoqqaat innarluutillillu peqatigiiffiat: Kr. 5.000,00
Sapaatip akunneranut ataasiarluni timigissarnissamut timimillu aalatitsinissamut aamma assassorluni aaqqissuussisarnernut neqeroorutit eqqanaarneqarnissaannik suliniuteqarnerannut. Ukioqqortugaluarlutik piumassuseqarluarlutik aaqqissuussinernik ingerlatsisarput.
Qaqortumi Tasersuup Atuarfiani 5. A: Kr. 5.000,00
Kigutiminnik ataavartussanik paarsilluarnermikkut naammassisaannut. Kigutigissaasut klassi nersualaarpaat 5 A’t ullut tamaasa kigutigissartarnerat pingaartuusoq oqaatigalugu.
Sabine Moritz, Ittoqqortoormiini peqqissaasoq: Kr. 5.000,00
Najukkami pinaveersaartitsinermi atatsimiititaliamik tunniusimalluarluni sulineranut. Illoqarfimmi suliniutinut arlalinnut siuttuuvoq.
Qiimmassaatit Nuummi tunniunneqartussat Naalakkersuisumit Arkalo Abelsen-imik pingasunngorpat 19. december nal. 14 Hotel Hans Egede-mi agguaanneqassapput. Tusagassiorfiit tikilluaqquneqarput.
